कर्पोरेट समाचार 
काठमाडौ । प्रधानमन्त्री सुशीला कार्कीले काठमाडौँ उपत्यकाका ‘मेयर’हरूसँग छलफल गरे ।
उपत्यका मेयर्स फोरमका प्रतिनिधिमण्डलसँग आज साँझ बालुवाटारमा भएको भेटमा स्थानीय तहका प्रमुखहरूले प्रधानमन्त्री कार्कीको नेतृत्वमा निर्वाचन सफलतापूर्वक सम्पन्न हुने विश्वास व्यक्त गर्दै त्यसका लागि पूर्ण सहयोग रहने प्रतिबद्धता व्यक्त गरेका छन् ।
भेटका क्रममा फोहर व्यवस्थापन, सडक बत्तीको बक्यौता, सुरक्षा चुनौती र विकास निर्माणका अवरोधलगायत स्थानीय तहलाई परेका विभिन्न समस्याबारे प्रधानमन्त्रीलाई अवगत गराएको र सरकारले यसबारे ‘बोल्ड’ निर्णय गर्नुपर्ने धारणासमेत राखेका प्रधानमन्त्रीको सचिवाललयले जनाएको छ ।
छलफलमा ललितपुर महानगरपालिका प्रमुख चिरिबाबु महर्जनले सडक बत्तीको बक्यौता रकम धेरै वर्षयता राफसाफ नभएको उल्लेख गर्दै ६० प्रतिशत स्थानीय तह र ४० प्रतिशत सङ्घीय सरकारले तिर्ने व्यवस्था मिलाइदिन प्रधानमन्त्रीलाई आग्रह गरे ।
गोकर्णेश्वर नगरपालिका प्रमुखले नेपाल ट्रस्टको जग्गामा सडक बिस्तारका लागि पहल गर्न अनुरोध गरे । टोखा नगरपालिका प्रमुख प्रकाश अधिकारीले टोखा–छहरे सडक चौडाइका लागि स्थानीयलाई मुआब्जा दिने निर्णय गर्न गैरदलीय सरकारले ऐतिहासिक कदम चाल्नुपर्ने सुझाव दिए ।
बूढानीलकण्ठ नगरपालिका प्रमुख मीठाराम अधिकारीले आन्दोलनसँग प्रत्यक्ष सम्बन्ध नराख्ने व्यक्तिहरूद्वारा गरिएको लुटपाटमा कडा कारबाही गर्नुपर्ने माग गरे । चाँगुनारायण नगरपालिका प्रमुख जीवन खत्रीले सल्लाघारी–कमलविनायक–नगरकोट सडक वर्षौंदेखि अधुरै रहेकाले छिटो सम्पन्न गरिदिन माग गर्यो ।
‘जेनजी’ प्रदर्शनपछि उत्पन्न सुरक्षा अवस्थाबारे पनि धेरै मेयरले ध्यानाकर्षण गराउँदै स्थानीय तहका कार्यालय सञ्चालनमा सहजता मिलाइदिन आग्रह गरेका थिए ।
प्रधानमन्त्री कार्कीले आफू निर्वाचनमा केन्द्रित रहेको उल्लेख गर्दै यसमा स्थानीय सरकारको सहयोग आवश्यक रहेको बताए । ‘एकातिर निर्वाचन मात्र गराऊ, अरु काम नगर भन्ने कुरा पनि उठेको छ । अर्कोतिर तपाईंहरूले उठाएका समस्या समाधानमा लाग्नुपर्ने माग छ । यसमा के–कति गर्न सकिन्छ, हेरौँला । समाधान तपाईं–हामी मिलेरै गर्ने हो ।’
भावी पुस्ताका लागि देशलाई बस्नलायक बनाउनु सबैको साझा दायित्व भएको बताउँदै प्रधानमन्त्री कार्कीले वर्षौंदेखिको एकलौटी शासनप्रति युवामा देखिएको असन्तुष्टि आत्मपरीक्षणको विषय भएको धारणा राखे ।
नयाँ पुस्ताको सोचअनुसार अघि बढ्नुपर्ने र प्रविधिसँगै हुर्किएको पुस्ताको अपेक्षा बुझ्नुपर्ने आवश्यकता रहेको उहाँको भनाइ थियो ।
प्रतिक्रिया दिनुहोस्