काठमाडौं । खुद ब्याज आम्दानीमा आएको गिरावट र इम्पेयरमेन्ट चार्जमा भएको उल्लेख्य वृद्धिका कारण कृषि विकास बैंक लिमिटेडको नाफा घटेको छ । बैंकले आर्थिक वर्ष २०८२-८३ को चौथो त्रैमाससम्म २ अर्ब ६३ करोड रुपैयाँ खुद नाफा आर्जन गरेको छ, जुन अघिल्लो आर्थिक वर्षको सोही अवधिको तुलनामा २९.५२ प्रतिशतले कम हो ।
अघिल्लो आर्थिक वर्षको चौथो त्रैमाससम्म बैंकले ३ अर्ब ७३ करोड रुपैयाँ खुद नाफा कमाएको थियो । समीक्षा अवधिमा बैंकको खुद ब्याज आम्दानी ३.४५ प्रतिशतले घटेर ९ अर्ब १२ करोड रुपैयाँमा सीमित भएको छ । बैंकको खुद सञ्चालन आम्दानी १० अर्ब ४ करोड रुपैयाँ तथा सञ्चालन मुनाफा ३ अर्ब ९४ करोड रुपैयाँ रहेको छ ।
बैंकको नाफामा दबाब सिर्जना गर्ने प्रमुख कारणमध्ये इम्पेयरमेन्ट चार्जको वृद्धि रहेको देखिएको छ । समीक्षा अवधिमा बैंकले सम्भावित कर्जा जोखिम व्यवस्थापनका लागि १ अर्ब १७ करोड ९० लाख रुपैयाँ इम्पेयरमेन्ट चार्ज छुट्टाएको छ । अघिल्लो आर्थिक वर्षको सोही अवधिमा यस्तो रकम ६३ करोड रुपैयाँ मात्र रहेको थियो ।
नाफामा गिरावट आए पनि बैंकको निक्षेप तथा कर्जा विस्तार भने सकारात्मक रहेको छ । बैंकको कुल निक्षेप एक वर्षमा २ खर्ब ९३ अर्ब रुपैयाँबाट बढेर ३ खर्ब ४७ अर्ब रुपैयाँ पुगेको छ । त्यसैगरी कर्जा प्रवाह २ खर्ब १२ अर्ब रुपैयाँबाट बढेर २ खर्ब ४७ अर्ब रुपैयाँ पुगेको छ । यद्यपि बैंकको खराब कर्जा अनुपात (एनपीएल) भने बढेको छ । अघिल्लो आर्थिक वर्षको चौथो त्रैमाससम्म ३.४४ प्रतिशत रहेको खराब कर्जा अनुपात समीक्षा अवधिमा ४.०७ प्रतिशत पुगेको छ । खराब कर्जा बढेसँगै बैंकले कर्जा नोक्सानी व्यवस्थापनका लागि थप प्रबन्ध गर्नुपरेको देखिन्छ ।
बैंकको वितरणयोग्य मुनाफामा पनि उल्लेख्य गिरावट आएको छ । अघिल्लो आर्थिक वर्षको चौथो त्रैमाससम्म २ अर्ब ८१ करोड रुपैयाँ रहेको वितरणयोग्य मुनाफा घटेर १ अर्ब २६ करोड रुपैयाँमा सीमित भएको छ । यसले बैंकको लाभांश वितरण क्षमतामा समेत प्रत्यक्ष असर परेको छ ।
खुद नाफा र वितरणयोग्य मुनाफा दुवैमा आएको गिरावटका कारण बैंकको लाभांश क्षमता १७.९८ प्रतिशतबाट झरेर ६.५४ प्रतिशतमा सीमित भएको छ । समीक्षा अवधिसम्म बैंकको प्रतिसेयर आम्दानी (ईपीएस) १६.११ रुपैयाँ, प्रतिसेयर कुल सम्पत्तिको मूल्य २ हजार ८९३.६१ रुपैयाँ तथा तरलता अनुपात ३७.४५ प्रतिशत कायम रहेको बैंकले जनाएको छ ।
प्रतिक्रिया दिनुहोस्