काठमाडौं। प्रधानमन्त्री वालेन्द्र शाहसँग संघीय मन्त्रीहरूले चालु आर्थिक वर्षमा गरिने मुख्य काम र उपलब्धि हासिल गर्नका लागि कार्यसम्पादन सम्झौता गरेका छन्।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा आज आयोजित कार्यक्रममा मन्त्रीहरूले प्रधानमन्त्री शाहसँग कार्यसम्पादन सम्झौतामा हस्ताक्षर गर्दै सम्झौताको प्रति आदानप्रदान गरेका हुन्। सरकारका प्राथमिकता र लक्ष्यलाई परिणाममुखी बनाउने उद्देश्यले सुशासन, सामाजिक न्याय र समृद्धिसँग सम्बन्धित विषयहरूलाई समेटेर यो कार्यसम्पादन सम्झौता गरिएको प्रधानमन्त्रीको सचिवालयले जनाएको छ।
प्रधानमन्त्री शाहले अर्थमन्त्री डा स्वर्णिम वाग्ले, परराष्ट्रमन्त्री शिशिर खनाल, ऊर्जा जलस्रोत तथा सिँचाइमन्त्री बिराज भक्त श्रेष्ठ, गृहमन्त्री सुधन गुरुङ, कानून, न्याय तथा संसदीय मामिलामन्त्री सोविता गौतम, विज्ञान, प्रविधि तथा नवप्रवर्तनमन्त्री महावीर पुनसँग कार्यसम्पादन सम्झौता गरे । यसैगरी, महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सिता बादी, भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावल, स्वास्थ्य तथा खाद्य स्वच्छतामन्त्री निशा मेहता, शिक्षा तथा खेलकुदमन्त्री सस्मित पोखरेल, संस्कृति, पर्यटन तथा नागरिक उड्डयनमन्त्री खडक राज पौडेल, सूचना तथा सञ्चारमन्त्री डा. विक्रम तिमिल्सिना, कृषि, वन तथा पर्यावरणमन्त्री गिता चौधरी र उद्योग, वाणिज्य तथा आपूर्तिमन्त्री गौरी कुमारीले पनि प्रधानमन्त्रीसँग कार्यसम्पादन सम्झौता गरेका छन् ।
कार्यसम्पादन सम्झौतामा पूर्वाधार विकास मन्त्री सुनिल लम्साल स्वास्थ्यअवस्थालाई देखाउँदै उपस्थित भएनन्। यस्तै, युवा, श्रम तथा रोजगार मन्त्री रामजी यादव संसदमा सहभागी भएकाले उपस्थित हुन नसकेको प्रधानमन्त्रीको सचिवालयले जनाएको छ। आजै प्रधानमन्त्री शाहसँग मुख्यसचिव गोविन्दबहादुर कार्कीले पनि कार्यसम्पादन सम्झौता गरेका छन्। यो सम्झौताले मन्त्रालयको कामलाई थप जिम्मेवार, प्रभावकारी र उपलब्धिमुखी बनाउने अपेक्षा प्रधानमन्त्रीको रहेको छ।
प्रतिक्रिया दिनुहोस्