कर्पोरेट समाचार 
काठमाडौं। निगालो होटल लिमिटेडले साधारण शेयर (आईपीओ) जारी गर्ने भएको छ । आईपीओ ल्याउने प्रक्रिया अघि बढाउँदै कम्पनीले आईपीओ निष्कासन तथा बिक्री व्यवस्थापनका लागि मुक्तिनाथ क्यापिटल लिमिटेडलाई बिक्री प्रबन्धकका रूपमा नियुक्त गरेको छ ।
नगरकोटस्थित परम्परागत तथा सांस्कृतिक शैलीको वास्तुकला झल्कने चार तारे होटलले आफ्नो जारी पूँजीको २५ प्रतिशतले हुन आउने १८ लाख ७५ हजा कित्ता साधारण शेयर सर्वसाधारणका लागि निष्काशन गर्ने तयारी गरेको छ । सम्झौतापत्रमा निगालो होटलका तर्फबाट अध्यक्ष टिकाराज बराल र मुक्तिनाथ क्यापिटल लिमिटेडका तर्फबाट प्रमुख कार्यकारी अधिकृत कविन्द्र ध्वज जोशी ले हस्ताक्षर गरेका छन् । उक्त अवसरमा चार्टर्ड एकाउन्टेन्ट अनिल पौडेलको समेत उपस्थिति रहेको कम्पनीले जनाएको छ ।
कम्पनीका अनुसार निगालो होटलले परम्परागत हेरिटेज अनुभव र आधुनिक आतिथ्य सेवामार्फत फरक पहिचान स्थापित गर्ने लक्ष्य लिएको छ । परियोजनामार्फत पर्यटन प्रवर्द्धन, रोजगारी सिर्जना तथा स्थानीय अर्थतन्त्रमा सकारात्मक योगदान पुग्ने अपेक्षा गरिएको कम्पनीले जनाएको छ ।
करिब १ अर्ब रुपैयाँ लगानी रहेको यो होटल सञ्चालनको अन्तिम चरणमा रहेको बताइएको छ । यस होटलमा ६८ वटा प्रिमियम कोठा (सुइटसहित), तीनवटा बैंक्वेट हल, तीनवटा रेस्टुरेन्ट, बार, पौडी पोखरी, स्पा, जिम, ध्यान कक्ष, कफी शप, सङ्गीत क्लबलगायत विभिन्न विश्वस्तरीय सुविधा रहनेछन् । साथै, भविष्यमा उक्त क्षेत्रकै पहिलो क्यासिनो सञ्चालन गर्ने योजना पनि दीर्घकालीन रणनीतिमा समावेश गरिएको छ ।
कम्पनीका अध्यक्ष बरालका अनुसार आईपीओ निष्कासनपछि निकट भविष्यमा पोखरा, काठमाडौं र चितवनजस्ता प्रमुख सहरहरूमा सेवा विस्तार गर्ने दीर्घकालीन योजना रहेको छ ।
कम्पनीका संस्थापक तथा प्रवर्द्धक समूहमा पर्यटन, जलविद्युत्, बैंकिङ तथा शैक्षिक क्षेत्रमा लामो अनुभव हासिल गरेका व्यवसायीहरूको संलग्नता रहेको छ । होटल सञ्चालनतर्फ २५ वर्षभन्दा बढी अनुभव भएका व्यवस्थापकहरूको नेतृत्वमा सेवा सञ्चालन गरिने कम्पनीले जनाएको छ ।
प्रतिक्रिया दिनुहोस्