काठमाडौं । कैलालीको गेटास्थित शहीद दशरथ चन्द स्वास्थ्य विज्ञान विश्वविद्यालयको उपकुलपतिमा आवेदन नपरेपछि शिक्षा, विज्ञान तथा प्रविधिमन्त्री महावीर पुनले चासो देखाएका छन् ।
विश्वविद्यालयको उपकुलपति पदमा नियुक्तिका लागि दुई पटक सार्वजनिक सूचना निकाल्दा समेत दरखास्त नपरेपछि आज मन्त्री पुनले आक्रोश पोखे । ‘दशरथ चन्द स्वास्थ्य विज्ञान विश्वविद्यालयको उपकुलपति पदका लागि दुईपटक विज्ञापन गर्दा पनि कसैको निवेदन परेन’, मन्त्री पुनले सामाजिक सञ्जालमा लेखेका छन् , ‘कोही नेपाल आमाको देशभक्त सन्तान हुनुहुन्छ भने निवेदन दिनुहोस् अथवा मलाई नै सम्पर्क गर्नुहोस् ।’
विश्वविद्यालयको उपकुलपति र रजिस्ट्रारका लागि सिफारिस समितिले गत १५ कात्तिकमा पहिलो पटक १५ दिने सूचना निकालेर आवेदन माग गरेको थियो । तर, उपकुलपतिका लागि आवेदन नपरेपछि फेरी ५ मंसिरसम्म म्याद थप गरेर समय बढाएको थियो ।
उपकुलपति र रजिस्ट्रार नियुक्तिका लागि सिफारिस समितिका संयोजक तथा विश्वविद्यालयसभाका सदस्य प्रा.डा.जयराज अवस्थीले रजिस्ट्रार छनोट तथा सिफारिससम्बन्धी कार्यविधिमा तोकिएको योग्यताको कारण उक्त पदमा आवेदन नपरेको जानकारी दिए ।
कार्यविधिअनुसार उपकुलपतिका लागि मान्यताप्राप्त विश्वविद्यालयबाट चिकित्साशिक्षासँग सम्बन्धित कुनै विधामा विद्यावारिधि, डीएम, एमसीएच वा सो सरहको उपाधि हासिल गरेको हुनुपर्नेछ । साथै, विश्वविद्यालयको प्राध्यापक पदमा कम्तीमा १० वर्ष काम गरेको हुनुपर्ने एवं दरखास्त पेस गर्ने अन्तिम दिनसम्म ३५ वर्ष उमेर पूरा भई ६१ वर्ष उमेर ननाघेको हुनुपर्नेलगायतका योग्यता चाहिन्छन् ।
संयोजक अवस्थीका अनुसार थपिएको म्यादमा पनि आवेदन नपरेपछि ऐन नै संशोधन गनुपर्ने अवस्था देखिएको छ । यद्यपी विश्वविद्यालयको रजिस्ट्रारका लागि भने १० जनाको आवेदन स्वीकृत भर्इ तीन जनालाई नियुक्तिका लागि प्रधानमन्त्रीसमक्ष सिफारिस गरिने संयोजक अवस्थीले जानकारी दिए । सङ्घीय संसदबाट पारित ‘सहिद दशरथ चन्द स्वास्थ्य विज्ञान विश्वविद्यालय ऐन, २०८२’ गत असार ४ गते राष्ट्रपति रामचन्द्र पौडेलले प्रमाणीकरण गरेका थिए ।
प्रतिक्रिया दिनुहोस्