कर्पोरेट समाचार 
काठमाडौं । नेपालको स्वास्थ्य क्षेत्रमा अङ्ग प्रत्यारोपणतर्फ किष्ट टिचिङ हस्पिटलले एक नयाँ उचाइ हासिल गरेको छ। अस्पतालको ग्यास्ट्रो विभागको नेतृत्वमा हालै १५औँ कलेजो प्रत्यारोपण सफलतापूर्वक सम्पन्न भएसँगै किष्टले नेपालमै उच्च सफलता दरको कीर्तिमान कायम गरेको जनाएको हो।
छोरीले दिइन् बुबालाई नयाँ जीवन
यसपटकको कलेजो प्रत्यारोपण चिकित्सा सफलताका साथै भावनात्मक रूपमा पनि विशेष रहेको अस्पतालले उल्लेख गरेको छ । जहाँ एक छोरीले आफ्ना बुबालाई कलेजो दान गरेर नयाँ जीवन दिएकी छिन्। यस कार्यलाई अस्पतालले मानवता, त्याग र पारिवारिक प्रेमको अनुपम उदाहरणको रूपमा उल्लेख गरेको छ।
अङ्ग प्रत्यारोपणमा किष्टको फड्को
सन् २००६ देखि सेवा दिँदै आएको किष्ट हस्पिटलले कलेजोसँगै मिर्गौला प्रत्यारोपणमा पनि महत्वपूर्ण उपलब्धि हासिल गरिसकेको छ। अस्पतालको तथ्याङ्क अनुसार हालसम्म १५ वटा कलेजो प्रत्यारोपण सफल भइसकेको छ। साथै, १९८ जनामा सफलतापूर्वक मिर्गौला प्रत्यारोपण गरिएको छ ।
किष्ट ग्यास्ट्रो सेन्टरको अत्याधुनिक उपकरण, अनुभवी सर्जनहरू र समर्पित मेडिकल टिमका कारण जटिल शल्यक्रियाहरू सम्भव भएको अस्पताल प्रशासनले जनाएको छ। निरन्तर सुधार र प्रविधिको उच्चतम प्रयोगले नै अस्पताललाई अङ्ग प्रत्यारोपणमा देशकै अग्रणी संस्थाको रूपमा स्थापित गरेको उल्लेख छ। ‘यो उपलब्धि सम्पूर्ण मेडिकल टिमको मेहेनत र बिरामी तथा दाताहरूको विश्वासको परिणाम हो। यसले हामीलाई भविष्यमा अझ धेरै जीवन बचाउन थप प्रेरणा दिएको छ’अस्पतालद्वारा जारी विज्ञप्तिमा भनिएको छ।
काठमाडौंको ग्वार्कोस्थित किष्ट टिचिङ हस्पिटलले बहुविशेषज्ञ सेवा प्रदान गर्दै आइरहेको छ ।
प्रतिक्रिया दिनुहोस्