काठमाडौं । गत वर्ष भएको उत्पादनको तुलनामा कैलालीमा यस वर्ष दुई हजार दुई सय ९८ मेट्रिक टनले गहुँ उत्पादन घटेको छ ।
कृषि ज्ञान केन्द्रका अनुसार यस वर्ष ३२ हजार आठ सय ४० हेक्टर क्षेत्रफलमा गहुँखेती गरिएकामा एक लाख १० हजार १४ मेट्रिक टन गहुँ उत्पादन भएको छ । गत वर्ष त्यति नै क्षेत्रफलमा गहुँखेती हुँदा एक लाख १२ हजार ३१२ मेट्रिक टन उत्पादन भएको थियो ।
गत वर्षको तुलनामा यस वर्ष गहुँको उत्पादकत्व पनि घटेको छ । गत वर्ष गहुँको उत्पादकत्व तीन दशमलव ४२ मेट्रिक टन प्रतिहेक्टर रहेकामा यस वर्ष तीन दशमलव ३५ मेट्रिक टन प्रतिहेक्टरमा झरेको केन्द्रका सूचना अधिकारी दुर्गाप्रसाद ओझाले जानकारी दिए ।
उनले भने, ‘उत्पादनमा केही कमी आएको छ । पानी आवश्यक पर्ने बेलामा वर्षा कम भयो, सबै किसानले उन्नत जातको बीउ प्रयोग नगर्दा उत्पादन घटेको हो ।’ कार्यालयले भने गहुँ उत्पादन वृद्धि गर्ने उद्देश्यले ५० प्रतिशत अनुदानमा किसानलाई उन्नत जातको बीउ उपलब्ध गराउँदै आएको छ ।
प्रतिक्रिया दिनुहोस्