कर्पोरेट समाचार 
काठमाडौं । सुपर खुदी हाइड्रोपावरले आईपीओ बिक्री खुला गरेको छ। कम्पनीले आयोजना प्रभावित स्थानीय र वैदेशिक रोजगारमा रहेकालाई पहिलो चरणमा जारी पूँजी १ अर्ब ५५ करोड रुपैयाँको २० प्रतिशत शेयर सर्वसाधारण समूहमा आजदेखि निष्कासन गरेको हो ।
कम्पनीले जारी पुँजी १ अर्ब ५५ करोड रुपैयाँको २० प्रतिशत अर्थात् ३१ करोड रुपैयाँको ३१ लाख कित्ता शेयर जारी गर्न नेपाल धितोपत्र बोर्डबाट अनुमति पाएको छ । जसमध्ये १५ करोड ५० लाख रुपैयाँको १५ लाख ५० हजार कित्ता शेयर आयोजना प्रभावित क्षेत्रका स्थानीय बासिन्दाहरूलाई छुट्याएको कम्पनीले जनाएको छ ।
ग्लोबल आईएमई क्यापिटल शेयर निष्कासन तथा बिक्री प्रबन्धक रहेको कम्पनीको आईपीओमा लगानीकर्ताले न्यूनतम १० तथा अधिकतम १ लाख कित्ताका लागि आवेदन दिन सक्नेछन् । अंकित मूल्य १ सय रुपैयाँ रहेको छ। स्थानीयबासीले छिटोमा माघ ६ तथा ढिलोमा २१ गतेसम्म आवेदन दिन सक्नेछन् । प्रभावितले बेसीशहरमा रहेका प्रभु बैंक, ग्लोबल आइएमई बैंक, कृषि विकास बैंक र प्राइम कमर्सियल बैंकका शाखाबाट आवेदन दिन सक्नेछन् ।
यस्तै, आयोजना प्रभावितको शेयर लमजुङको मर्स्याङ्दी गाउँपालिका २ र ३ का स्थानीयका लागि ४० प्रतिशत र सोही गाउँपालिकाका वडा नम्बर १,४,५,६,७, ८ र ९ का स्थानीयका लागि ६० प्रतिशत छुट्याइएको कम्पनीले जनाएको छ । वैदेशिक रोजगारमा रहेकालाई भने कम्पनीले १ लाख ५५ हजार कित्ता शेयर छुट्याइएको छ । वैदेशिक रोजगारमा रहेकाले छिटोमा पुस २५ र ढिलोमा माघ ६ गतेसम्म अनलाइन प्रणाली मेरोसेयरमार्फत आवेदन दिन सक्नेछन् ।
कम्पनीले लमजुङमा २६ मेगावाटको माथिल्लो खुदी जलविद्युत् आयोजना बनाएको छ । जसको प्रतिमेगावाट लागत २० करोड ६९ लाख ३८ हजार रुपैयाँ छ ।
प्रतिक्रिया दिनुहोस्