कर्पोरेट समाचार 
काठमाडौं । चिनियाँ अटोमोबाइल क्षेत्रको कम्पनी डोंगफेङ मोटरले युरोपेली बजारमा आफ्नो पकड बलियो बनाउने उद्देश्यका साथ जर्मनीको म्युनिखमा अत्याधुनिक डिजाइन केन्द्र स्थापना गरेको छ। युरोपेली ग्राहकहरूको विशिष्ट रुचि र आधुनिक आवश्यकताहरूलाई सम्बोधन गर्न यो केन्द्रले रणनीतिक भूमिका खेल्ने विश्वास कम्पनीको छ ।
म्युनिखमा सञ्चालनमा आएको यो नयाँ स्टुडियो डोंगफेङको एकीकृत विश्वव्यापी अनुसन्धान तथा विकास (R&D) सञ्जालको एउटा महत्वपूर्ण हिस्सा हो। यसअघि चीनको वुहान र सांघाईमा रहेका स्टुडियोहरूसँगै अब म्युनिख केन्द्रले पनि कम्पनीको ग्लोबल डिजाइन भिजनमा योगदान दिनेछ। गत जनवरी २९ मा एक औपचारिक समारोहका बीच उद्घाटन गरिएको यस केन्द्रले डोंगफेङको प्रिमियम ब्रान्डहरू-M-Hero र Voyah का आगामी परियोजनाहरूमा विशेष ध्यान केन्द्रित गर्नेछ। कम्पनीका अनुसार, म्युनिखलाई डिजाइन केन्द्रको रूपमा रोज्नुका पछाडि बाभेरियाको राजधानी म्युनिखलाई विश्वकै अग्रणी अटोमोबाइल इन्जिनियरिङ र डिजाइनको केन्द्र (हब) मानिनु हो । अत्याधुनिक प्रविधिस् यस केन्द्रले Cloud Solutions, VR/AR (Virtual/Augmented Reality), र एआई टूल्सको प्रयोग गरी डिजाइन प्रक्रियालाई तीव्र र प्रभावकारी बनाउनेछ।
कम्पनीका अनुसार यो स्टुडियोले केवल डिजाइन मात्र नगरी विश्वव्यापी मार्केटिङ र ब्रान्ड रणनीतिमा पनि काम गर्नेछ, जसले गर्दा युरोपेली बजारको माग अनुसार उत्पादनहरूलाई छिटो परिवर्तन गर्न सहज हुनेछ। ‘म्युनिख डिजाइन केन्द्रको स्थापनाले डोंगफेङलाई युरोपेली ग्राहकहरूको भावना बुझ्न र प्रिमियम सेग्मेन्टमा गुणस्तरीय उत्पादनहरू ल्याउन मद्दत गर्नेछ। यो हाम्रो विश्वव्यापी विस्तारको एउटा बलियो खम्बा हो’ कम्पनीले जारी गरेको विज्ञप्तिमा उल्लेख छ ।
प्रतिक्रिया दिनुहोस्