काठमाडौं । नेपाली सेनाको ‘सैनिक कल्याणकारी कोष’मा जम्मा भएको सम्पत्ति ८७ अर्ब नाघेको छ ।
५८ वर्ष अगाडी ( २०३२ सालमा) एक करोड २४ लाख रुपैयाँबाट सुरु गरिएको उक्त कोषमा चालु आवको पुस मसान्तसम्ममा ८७ अर्ब एक करोड रुपैयाँ पुगेको हो ।
नेपाली सेनाले आज पत्रकार सम्मेलन गर्दै उक्त सम्पत्तिमध्ये ७९ अर्ब २८ करोड ५६ लाख रुपैयाँ बैंक तथा वित्तीय संस्थामा नगद मौज्दात रहेको जनाएको छ । सात अर्ब ७२ करोड ४४ लाख रुपैयाँ भने विभिन्न परियोजनामा लगानी गरिएको सेनाले जानकारी गराएको हो । नेपाली सेनाका अनुसार स्वास्थ्य विज्ञान संस्थानमा दुई अर्ब ३० करोड ९४ लाख र कल्याणकारी भवन तथा त्रि–चन्द्र मिलिटरी हस्पिटलमा एक अर्ब ६० करोड ६० लाख रुपैयाँ लगानी रहेको उल्लेख छ ।
सैनिक कल्याणकारी कोषबाट करिब १० लाखभन्दा बढी सेवाग्राहीले सेवा तथा लाभ प्राप्त गरिरहेका छन् ।
तर सेनाले निक्षेपको प्रतिशतमा आएको गिरावटले सेवाग्राहीलक्षित कल्याणकारी कार्य तथा सार्वजनिक दायित्वहरू प्रभावित पार्ने देखिएको जनाएको छ । सेनाका अनुसार सेवाग्राहीहरूको जीवनस्तरमा सुधार ल्याउन शिक्षा, स्वास्थ्य, सीप र स्वःरोजगार तथा सुविधा र सहुलियत समेत गरी चार ‘स’ को अवधारणालाई आधार मानी कल्याणकारी कार्यहरू सञ्चालन हुँदै आएका छन् । कोषको संरक्षक प्रधानमन्त्री र सह–संरक्षक रक्षामन्त्री रहने व्यवस्था छ।
सैनिक कल्याणकारी कोषको आयस्रोत बैंकमा निक्षेप गरिएको रकमबाट प्राप्त हुने व्याज, शान्ति सेनामा भाग लिएबापत प्राप्त हुने रकम र सकल दर्जाको भत्ताबापत रकम कट्टा गरी जम्मा हुनआउने रकमका साथै अन्य विभिन्न आयमूलक कार्यहरूबाट संकलित रकम रहेको छ ।
प्रतिक्रिया दिनुहोस्