एजेन्सी । विश्वका डलर अर्बपतिहरूको प्रभाव बढ्दै गएको छ । सन् २०२५ को फोर्ब्स विश्व अर्बपति सूचीमा ३ हजार २८ जना परेका छन् । यो वर्ष २४७ जना नयाँ अर्बपति सूचीमा थपिएका छन् । यो संख्याले अमेरिकासँगै विश्वभर अर्बपतिको संख्या बढ्दै गएको मात्र देखाएको छैन विश्वमा पहिलो पटक अर्बपतिको संख्या ३ हजार नाघेको पनि छ ।
विश्वभरका ३ हजार २८ जना अर्बपतिको कुल सम्पत्ति १६.१ ट्रिलियन अमेरिकी डलर पुगेको छ । यो सम्पति गत वर्षको तुलनामा २ ट्रिलियन डलरले वृद्धि हो ।
फोर्ब्सका अनुसार एलन मस्क ३४२ अर्ब डलर सम्पत्तिसहित विश्वकै धनी व्यक्ति । अमेरिकी राष्ट्रपति डोनाल्ड ट्रम्पका मुख्य सल्लाहकार मक्सको कूल सम्पति ३४२ अर्ब डलर छ । मक्सले अन्तरिक्ष कम्पनी स्पेसएक्स र एआई कम्पनी एक्सएआईको सफलताबाट १४७ अर्ब डलर थप आर्जन गरेका छन् । यस्तै, दोस्रो स्थानमा २१६ अर्ब डलर सम्पत्तिसहित मेटाका मार्क जुकरबर्ग रहेका छन् । अमेजनका संस्थापक जेफ बेजोस २१५ अर्ब डलर सम्पत्तिका साथ तेस्रो स्थानमा छन् । ओराकलका मालिक ल्यारी एलिसन १९२ अर्ब डलर सम्पत्तिसहित चौथो स्थानमा पर्दा बर्नार्ड अर्नोल्ट १७८ अर्ब डलरसहित पाँचौं स्थानमा झरेका छन् ।
अमेरिकी राष्ट्रपति डोनाल्ड ट्रम्पको सम्पत्ति एक वर्षमै दोब्बर भएको छ । उनको कूल सम्पत्ति २.३ अर्ब डलरबाट बढेर ५.१ अर्ब डलर पुगेको छ । ट्रम्प प्रशासनमा मात्रै कम्तीमा १० अर्बपति र अर्बपतिका सहयात्री छन् । मेटाका मार्क जुकरबर्गदेखि फ्रेन्च लक्जरी ब्रान्डका मालिक बर्नार्ड अर्नोल्टसम्मका व्यवसायीले ट्रम्पलाई समर्थन गरेका छन् । अर्बपतिहरूको कुल सम्पत्ति अमेरिका र चीनबाहेक अन्य सबै देशहरूको कुल गार्हस्थ्य उत्पादन (जीडीपी) भन्दा बढी हो । अहिले एक अर्बपतिको औसत सम्पत्ति ५.३ अर्ब डलर पुगेको फोब्र्सले उल्लेख गरेको छ ।
यस्तै, सबैभन्दा धेरै अर्बपति बस्ने देश अमेरिका बनेको छ । हाल ९०२ जना अर्बपति अमेरिकामा बस्छन् । त्यसपछि चीनमा ५१६ अर्बपति छन् । तेस्रो, भारतमा २०५ जना अर्बपति छन् । यी तीन देशका अर्बपतिले सूचीमा आधा स्थान ओगटेका छन् ।
यसैगरी, यस वर्ष २८८ जना नयाँ अर्बपति फोर्ब्सको सूचीमा अटाएका छन् । संगीतकार ब्रुस स्प्रिङस्टिन (१.२ अर्ब डलर) देखि चलचित्र अभिनेता अर्नोल्ड श्वार्जनेगर (१.१ अर्ब डलर) क्रिप्टो व्यापारी जस्टिन सन (८.५ अर्ब डलर) जस्ता व्यक्ति अर्बपतिको सूचीमा थपिएका छन् ।
सबैभन्दा धनी महिला अर्बपतिको संखया ४०६ पुगेको छ । उनीहरूको कुल सम्पति १३.४ प्रतिशत रहेको फोब्र्सले जनाएको छ। अर्बपति महिलाहरूको पहिलो नम्बरमा १०१ अर्ब डलर सहित एलिस वाल्टन परेकी छिन् । उनले ८१.६ अर्ब डलर सम्पति रहेको लोरियलकी उत्तराधिकारी फ्रान्स्वा बेटनकोर्ट मेयर्सलाई उछिनेकी छिन् । स्विजरल्याण्डकी व्यवसायी राफाएला अपन्टे डायमेन्ट ३७.७ अर्ब डलर सहित विश्वको सबैभन्दा धनी ‘सेल्फ–मेड’ महिला बनेको फोब्र्सले जनाएको छ ।
नेपालका एकमात्र अर्बपति चौधरी
नेपालका एकमात्र डलर अर्बपति विनोद चौधरीको सम्पत्ति २ अर्ब अमेरिकी डलर पुगेको छ । फोर्ब्सका अनुसार उनको कूल सम्पति २०० मिलियन डलर पुगेको हो । ६९ वर्षिय चौधरी फोर्ब्सले हालै प्रकाशन गरेको ३ हजार २८ जना अर्बपतिहरुको नयाँ सुचीमा १७३० औं नम्बरमा परेका छन् । सन् २०२३ र २४ मा चौधरीको सम्पत्ति १ अर्ब ८०० मिलियन अमेरिकी डलर थियो ।
प्रतिक्रिया दिनुहोस्