काठमाडौं । चालु आर्थिक वर्ष २०८१ -८२ को पहिलो दश महिनामा नेपालको वैदेशिक व्यापारमा उल्लेख्य सुधार देखिएको छ। भन्सार विभागका अनुसार श्रावणदेखि बैशाखसम्मको अवधिमा कुल वैदेशिक व्यापार १६ खर्ब ९२ अर्ब ९९ करोड रुपैयाँ पुगेको छ, जुन अघिल्लो वर्षको सोही अवधिको तुलनामा १८.३७ प्रतिशतले वृद्धि हो।
निर्यातमा ७२ प्रतिशतको उछाल
यो अवधिमा निर्यातमा अत्यन्त उत्साहजनक वृद्धि भएको छ। कुल निर्यात २ खर्ब १७ अर्ब ९१ करोड रुपैयाँ पुगेको छ, जुन अघिल्लो वर्षको १ खर्ब २६ अर्ब १७ करोड रुपैयाँको तुलनामा ७२.७१ प्रतिशतले बढी हो। निर्यात वृद्धिको यो दर हालसम्मकै उच्चमध्ये पर्न गएको देखिन्छ। एकै समयमा कुल आयात पनि १३.११ प्रतिशतले बढेर १४ खर्ब ७४ अर्ब १८ करोड रुपैयाँ पुगेको छ। अघिल्लो वर्षको सोही अवधिमा यो १३ खर्ब ३ अर्ब ३५ करोड रुपैयाँ थियो।
व्यापार घाटा अझै उच्च, तर वृद्धिदर सुस्त
यद्यपि व्यापार घाटा अझै पनि उच्च नै रहेको छ। यस अवधिमा व्यापार घाटा १२ खर्ब ५६ अर्ब २७ करोड रुपैयाँ पुगेको छ, जुन अघिल्लो वर्षको तुलनामा ६.७२ प्रतिशतले बढी हो। निर्यात वृद्धिको दर आयातको तुलनामा दोब्बरभन्दा बढी भए पनि व्यापार घाटा न्यूनीकरणमा ठोस सुधार देखिएको छैन। त्यस्तै कुल व्यापारमा निर्यातको हिस्सा ८.८३ प्रतिशतबाट बढेर १२.८८ प्रतिशत पुगेको छ, जसले ४५।९१ प्रतिशतको सुधार देखाउँछ। यता, आयातको हिस्सा भने ९१.१७ प्रतिशतबाट घटेर ८७.१२ प्रतिशतमा झरेको छ।
प्रतिक्रिया दिनुहोस्