ओडी लिएर पुनर्निमार्ण गर्दा यसले सार्वजनिक ऋण बढ्दैन : नरबहादुर थापा

काठमाडौं । नेपाल राष्ट्र बैंकका पूर्व कार्यकारी निर्देशक नरबहादुर थापाले जेन जी आन्दोलनपछि भएको ठूलो क्षतिको नकारात्मक प्रभाव कम गर्न आर्थिक पुनरुत्थानमा सरकारले काम गर्नुपर्ने बताएका छन् ।

विज्ञापन

मंगलबार नेपाल काठमाडौंमा आयोजित अर्थतन्त्रको पुनरोत्थानको आगामी बाटो विषयक अन्तरक्रियामा थापाले यस्तो बताएका हुन् ।

‘जेनजी प्रदर्शनले हाम्रोमा भौतिक क्षति ठूलो मात्रामा भएको छ । यस्तो क्षति यो भन्दा पहिला कहिले पनि भएको थिएन । आर्थिक हिसाबमा क्षति भन्दा यसको प्रभाव झनै ठूलो छ,’ थापाले भने, ‘यद्यपि, सरकारले वित्तीय स्थिति बिग्रिन नदिन केही प्याकेजहरु दिने घोषणा गरिसकेको छ। अब सरकारले यी कुराहरुलाई निरन्तरता दिँदै आर्थिक पुनरुत्थानमा काम गर्नुपर्ने आवश्यक छ ।’

उनले केन्द्रीय बैंकको ऐनमा भएको व्यवस्था बमोजिम ओडी लिएर पुननिर्माणमा लाग्दा उचित हुने सुझाए। अबको मुख्य विषय स्रोत व्यवस्थापन भएकाले अहिले सरकार ओडी लिएर पुननिर्माणमा जुट्नुपर्ने उपयक्त समय भएको उनको भनाइ छ ।

ओडी लिएर पुनर्निमार्ण गर्दा यसले सार्वजनिक ऋण नबढ्ने र विदेशी मुद्रा सञ्चितिमा पनि असर नपर्ने थापाको भनाइ छ । सरकारले क्षति पुगेका प्रहरी चौकी लगायतका संरचना ओडी लिएर निर्माण गर्दा राज्यका संयन्त्र पनि परिचालन हुने र मनोबल पनि उकास्न सकिने बताए । जीडीपीको पााँच प्रतिशत बराबर आर्थिक क्षति भएको उल्लेख गर्दै उनले थप बेरोजगारी बढ्ने देखिएकाले त्यसतर्फ सोच्नुपर्ने धारणा राखे ।

‘निजी क्षेत्रमा ८० अर्बको क्षति भएको अनुमान आएको छ भने व्यक्तिगत पनि धेरै क्षति भएको छ । यसमा सरकारी संयन्त्रको क्षति पनि जोड्दा करिब २४० अर्ब अर्थात् मुलुकको कुल ग्राहर्स्थ उत्पादन (जीडीपी) को चाररपाँच प्रतिशत असर पुराएको अनुमान गर्न सकिन्छ,’ थापाले भने, ‘बेरोजगारीका कारण आन्दोलन भएकोमा अहिले, यहि आन्दोलनका कारण थप बेरोजगार बढ्ने हो कि भन्ने पनि देखिएको छ ।’

उनले धेरैको रोजगारी गुमिसकेको अवस्थामा यसको मुख्य असर विश्वभर नै नेपाल भ्रष्टाचारयुक्त मुलुकको रुपमा दर्ज भएको सन्देश प्रवाह भएको पनि बताए ।
निजी क्षेत्रको मनोलब कमजोर भएको र व्यापार व्यवसायसमेत धराप बनेको भन्दै गएको हालको अवस्थामा विदेशी लगानी पनि आउने होकि नआउने हो भनेर सोच्न बाध्य हुने स्थिति सिर्जना भएको बताए । यी सबै विषयलाई मध्येनजर गरेर सरकारले आईटी, पर्यटनलगायतका क्षेत्रमा वैदेशिक लगानी ल्याउन अगाडि बढ्नुपर्ने थापाले बताए ।

‘बाहिरबाट पुँजी ल्याउने काममा पनि सरकार अग्रसर हुनुपर्नेछ । विश्व बैंकसँग कुरा गरेर एसएमई र आईटी क्षेत्रमा लगानी भित्र्याउने काममा अगाडि बढ्न सकेमा मुलुकका लागि थप राम्रो हुन्छ,’थापाले भने, ‘पर्यटन क्षेत्रमा पनि यहि किसिमको नीति अपनाउन सकिन्छ । यसरी, बाहिरको लगानी भित्र्याउन सकेमा हाम्रो अन्तर्राष्टिय इमेज पनि राम्रो देखिन सहयोग पुग्छ ।’