कर्पोरेट समाचार 
काठमाडौं। कोशी प्रदेशको उद्योग, कृषि र सहकारी मन्त्रालयसँग टी एलायन्स अफ नेपाल र केनेक्ट किसानले नेपालमा उत्पादित चियाको अन्तर्राष्ट्रिय बजारमा विस्तार गर्नेबारे रणनीतिक छलफल गरेको छ ।
बैठकमा नेपालको अर्थोडक्स र विशेष चियाको अन्तर्राष्ट्रिय बजारमा प्रवर्धन गर्नका लागि आवश्यक रणनीतिहरूमा छलफल भएको हो ।
चियाको गुणस्तर, उत्पादन प्रविधि र बजार पहिचानका बारेमा विशेष छलफल भएको छ । नेपालका उत्कृष्ट चियाको विश्वव्यापी बजार विस्तार र चिया किसानहरूको सशक्तिकरणलाई प्रवर्धन गर्ने मुख्य उद्देश्यका साथ मन्त्रालयलाई विभिन्न रणनीतिहरू प्रस्ताव गरिएको थियो।
बैठकमा कोशी प्रदेशका उद्योग, कृषि र सहकारी मन्त्री खगेनसिं हाङगाम, प्रदेश सचिव डा.शरण कुमार पाण्डे, कनेक्ट किसानका निर्देशक राजन दाहाल र टी एलायन्स अफ नेपालका उपाध्यक्ष जीवन नेउपाने लगायत सहभागी थिए ।
टी एलायन्स अफ नेपाल र कनेक्ट किसानको संयुक्त प्रयासले नेपालको चिया उद्योगलाई अन्तर्राष्ट्रिय बजारमा मजबुत बनाउने र चिया किसानहरूको आर्थिक समृद्धिमा योगदान पुर्याउने अपेक्षा गरिएको छ।
प्रतिक्रिया दिनुहोस्