काठमाडौं । नेपालको अग्रणी शिशु हाइजिन र डायपर निर्माता कम्पनी ब्रजेश्वरी इन्डस्ट्रीज प्रा.लि. ले भारतीय मानक ब्यूरो (BIS) को प्रमाणपत्र प्राप्त गर्दै ऐतिहासिक उपलब्धि हासिल गरेको छ। यससँगै ब्रजेश्वरी इन्डस्ट्रीज बीआइएस मान्यता प्राप्त गर्ने पहिलो नेपाली बेबी हाइजिन निर्माता कम्पनी बन्न सफल भएको छ । उक्त प्रमाणपत्रसँगै कम्पनीले विगत केही महिनादेखि रोकिएको भारततर्फको निर्यात पुनः सुरु गरेको छ।
सन् २०१९ मा ब्रजेश्वरी समूहका अध्यक्ष तथा दूरदर्शी व्यवसायी एस.पी. ढकालद्वारा स्थापित यो कम्पनीले छोटो समयमा नै नेपाली हाइजिन उद्योगमा उल्लेखनीय क्रान्ति ल्याएको छ। प्रारम्भमा करिब ६० करोड रुपैयाँको लगानीबाट सुरु भएको ब्रजेश्वरी इन्डस्ट्रीजले आज ‘न्यानो’ र ‘टेण्डर टच’ जस्ता ब्रान्डमार्फत नेपाली बजारमा गुणस्तरीय र विश्वसनीय बेबी डायपर उत्पादनकर्ताको पहिचान बनाएको छ।
बीआइएस प्रमाणीकरणः चुनौती र सम्भावना दुबै
भारतले शिशु हाइजिन सामग्रीको आयातमा बीआइएस प्रमाणपत्र अनिवार्य गरेपछि कम्पनीको निर्यात प्रक्रिया ६ महिनासम्म रोकिएको थियो। यद्यपि, कडा मापदण्ड र अस्वीकृति दरबीच पनि ब्रजेश्वरीले छिटो र प्रभावकारी प्रक्रिया अपनाउँदै प्रमाणपत्र प्राप्त गर्न सफल भयो।
‘कडा परीक्षण र सम्पूर्ण नियमको पालना गर्दै बीआइएस प्रमाणपत्र प्राप्त गर्नु कम्पनीको लागि मात्र होइन, सम्पूर्ण नेपाली उत्पादन उद्योगका लागि नयाँ अध्याय हो,’ अध्यक्ष ढकालले बताए।
भारतमा निर्यातमा ५० करोडको वृद्धि हुने अपेक्षा
बीआइएस प्रमाणीकरणले कम्पनीको भारतमा निर्यात वृद्धि गर्ने ढोका खोलेको छ। ब्रजेश्वरीले आगामी वर्षमा कम्तीमा ५० करोड रुपैयाँ बराबरको निर्यात गर्ने लक्ष्य लिएको छ। नेपाल–भारत व्यापार सन्धिअनुसार नेपाली डायपरमा भारतमा भन्सार नलाग्ने भएकाले दुवै पक्षका लागि यो लागतमैत्री विकल्प हुने विश्वास गरिएको छ।
रणनीतिक स्थान र बढ्दो रोजगारी
कम्पनीको रामग्राम, परासीमा अवस्थित उद्योग स्थल भारतको उत्तर प्रदेश सीमा सहर सुनौलीबाट मात्र १२ किलोमिटरको दूरीमा पर्दछ। भौगोलिक दृष्टिले पनि भारतीय आयातकर्ताहरूका लागि यो स्थान लजिस्टिक दृष्टिले लाभदायक मानिन्छ।
हाल कम्पनीमा १०० भन्दा बढी दक्ष जनशक्ति कार्यरत छन् भने बढ्दो मागलाई सम्बोधन गर्न उत्पादन क्षमता अझ विस्तार गर्ने तयारीमा रहेको छ। साथै, कम्पनीले OEM सेवा र ठेक्का उत्पादनको सम्भावनामा समेत भारतीय कम्पनीहरूसँग सहकार्यको स्वागत गरेको छ।
नेपाली गुणस्तर, अन्तर्राष्ट्रिय पहिचान
‘गुणस्तर, नवप्रवर्तन र हाइजिनमा नयाँ मानक स्थापित गर्ने’ उद्देश्यसहित अगाडि बढिरहेको ब्रजेश्वरी इन्डस्ट्रीजले नेपाली उत्पादनलाई अन्तर्राष्ट्रिय बजारमा पुर्याउने दीर्घकालीन लक्ष्य लिएको छ।
कम्पनीले नेपालमै उत्पादन गरिएका विश्वस्तरीय डायपर भारतीय बजारमा पुर्याउँदै मात्र होइन, नेपालको औद्योगिक सम्भावनालाई समेत अन्तर्राष्ट्रिय स्तरमा उजागर गरिरहेको छ।
प्रतिक्रिया दिनुहोस्