धान नफलेपछि किसानले खेतमै लगाए आगो, भोकमरीको त्रासमा मुगुका जनता

मुगु । मुगुको पश्चिमी भेगमा पर्ने खत्याड गाँउपालिकाका कृषकले लगाएको धानमा बाला नलागेपछि खेतमै आगो लगाएका छन् ।

विज्ञापन

खडेरीसँगै धानका बाला नलागेपछि खत्याड गाउँपालिकाका वडा नम्बर–१० का कृषक चिन्तित बनेका छन् । गत जेठ–असारमा खत्याड गाउँपालिकाका ह्याङ्खु गाउँका एक सय २५ घर परिवारले लगाएको धान नफलेपछि उनीहरुले खेतमै आगो लगाएका हुन् ।

यहाँका ह्याङ्खु बासीहरुको मुख्य खाद्यान्न बाली नै धान हो । भुवा अर्थात् पाखे खेती गर्ने जमिन निकै कम हुँदा यहाँका स्थानीयको वर्षभरीको मुख्य खाद्यान्नको जोहो धान उत्पादनमा भर पर्ने स्थानीय किसान धनलाल रोकायाले बताए ।

खत्याड गाउँपालिका–१० का ६५ वर्षीय कृषक धनलाल रोकायाका अनुसार खडेरीका कारण धान नफलेको हो। अहिले उनी भोकमरीको सामना गर्नुपर्ने होकि भन्ने चिन्तामा छन् । ‘धानबालीमा बाला छैन्, सिँचाइको कुलो बाढीले पहिल्यै बगाएको थियो । आकाशबाट पानी परेन, त्यसैले यसवर्ष भोकमरी होला जस्तो छ ।’ ।
जीवन निर्वाहका लागि रोजगारी खोज्दै भारत जान उमेरका कारण नसक्ने दुखेसो गर्दै उनले भने, ‘भारत जाने अवस्था छैन, अब परिवारको विचल्ली हुने भयो । यस्तो अवस्थामा सरकारबाट राहत पाइन्छकी भन्ने आशामा छौं।’

अर्का कृषक चन्द बहादुर रोकायाले अर्को वर्ष खेतीका लागि धानको बीउकै अभाव हुने बताउँछन् । पालिका अध्यक्ष अज बहादुर शाहीले खडेरीको मारमा परेका किसानलाई स्थानीयसँगै प्रदेश र केन्द्रीय सरकारबाट राहतका लागि पहल गर्ने आस्वासन दिए ।