काठमाडौं । आगामी तीन दिन नेपाली राजनीतिको केन्द्रमा शपथग्रहण कार्यक्रम रहने भएका छन्। प्रतिनिधिसभाका नवनिर्वाचित सदस्यदेखि सम्भावित प्रधानमन्त्रीसम्मका लागि क्रमिक रूपमा शपथग्रहण कार्यक्रम तय गरिएको हो।
बालेन्द्र शाह प्रधानमन्त्री बन्ने प्रक्रियामा अघि बढिरहेका छन्। तर उनी प्रधानमन्त्री पदका लागि औपचारिक रूपमा योग्य हुनुअघि प्रतिनिधिसभा सदस्य पदको शपथ लिनुपर्नेछ।
प्रतिनिधिसभाका २७४ जना नवनिर्वाचित सदस्यलाई पद तथा गोपनीयताको शपथ गराउने जिम्मेवारी अर्जुननरसिंह केसी ले पाएका छन्। उनी प्रतिनिधिसभाका ज्येष्ठ सदस्य भएकाले उक्त जिम्मेवारी उनको भागमा परेको हो।
यसअघि २०७९ सालमा ज्येष्ठ सदस्यका रूपमा पशुपति शमशेर जबरा ले यस्तै भूमिका निर्वाह गरेका थिए।
ज्येष्ठ सदस्यका रूपमा प्रतिनिधिसभाको अध्यक्षता गर्ने भएकाले केसीले स्वयं पनि रामचन्द्र पौडेल समक्ष पद तथा गोपनीयताको शपथ लिनुपर्ने हुन्छ। राष्ट्रपति कार्यालयले केसीको शपथग्रहण कार्यक्रम चैत ११ गतेका लागि तय गरिसकेको छ।
त्यसपछि केसीले चैत १२ गते बालेन्द्र शाह सहित २७४ जना सांसदलाई शपथ गराउनेछन्। शपथग्रहणको भोलिपल्ट राष्ट्रिय स्वतन्त्र पार्टी(रास्वपा) ले शाहलाई संसदीय दलको नेता चयन गर्ने तयारी गरेको छ।
लगत्तै राष्ट्रपति पौडेलले शाहलाई प्रधानमन्त्री नियुक्त गर्ने प्रक्रिया अघि बढाउनेछन्। नवनियुक्त प्रधानमन्त्री शाहको शपथग्रहण कार्यक्रम चैत १३ गतेका लागि तय गरिएको छ।
यसरी चैत ११, १२ र १३ गते लगातार तीन दिन देशका प्रमुख राजनीतिक गतिविधि शपथग्रहणमै केन्द्रित हुने भएका छन्।
प्रतिक्रिया दिनुहोस्