सुनको मूल्य ४५ सय रुपैयाँले घट्यो, चाँदी पनि सस्तियो

काठमाडौं । स्थानीय बजारमा आज सुनचाँदीको मूल्यमा गिरावट आएको छ । आज सुन प्रतितोला ४५ सय र चाँदी ३३० रुपैयाँले घटेको हो ।

विज्ञापन

नेपाल सुनचाँदी व्यवसायी महासङ्घका अनुसार आइतबार एक तोला सुनको भाउ दुई लाख ९४ हजार रुपैयाँ कायम भएको छ । शुक्रबार सुन प्रतितोला दुई लाख ९८ हजार ५०० रुपैयाँमा खरिदबिक्री भएको थियो । त्यसअघि बिहीबार सुन प्रतितोला तीन लाख दुई हजार २०० रुपैयाँमा किनबेच भएको थियो ।

यस्तै, आज चाँदीको मूल्यमा पनि गिरावट देखिएको छ। महासंघका अनुसार आज चाँदी तोलामा पाँच हजार ६० रुपैयाँ कायम भएको छ । अघिल्लो साता लगातार चार कारोबार दिन उकालो लागेको चाँदीको मूल्य शुक्रबार ३५५ रुपैयाँले घटेर पाँच हजार ३९० रुपैयाँमा खरिदबिक्री भएको थियो ।