काठमाडौं । रसुवास्थित भोटेकोशी नदीमा बुधबार बिहान आएको भीषण बाढीपछि नेपाली सेना र निजी क्षेत्रका हेलिकप्टरमार्फत ११४ जना बाढी प्रभावितको हवाई उद्धार गरिएको छ।
नेपाल प्रहरीका अनुसार नेपाली सेनाले विभिन्न उडानमार्फत ८५ जना र निजी क्षेत्रका विभिन्न हेलिकप्टर कम्पनीले २९ जनाको उद्धार गरेका छन्। नेपाली सेनाले टिमुरे–धुन्चेबाट ६० जना, टिमुरे–त्रिशूलीबाट १३, मैलुङबाट पाँच, बेत्रावतीबाट चार तथा त्रिशूलीबाट काठमाडौं तीन जनाको उद्धार भएको छ।
निजी क्षेत्रतर्फ कैलाश हेलिकप्टरले रसुवाबाट पाँच जनालाई टिचिङ अस्पताल, सिम्रिकले रसुवाबाट तीन जनालाई, अन्नपूर्ण हेलिले रसुवाबाट टिचिङ अस्पताल चार जनालाई उद्धार गरेको छ। त्यस्तै प्रभु हेलिकप्टरले रसुवाबाट टिचिङ अस्पताल पाँच, सिम्रिकले दुई, फिसटेलले पाँच, एभरेष्टले दुई तथा प्रभु हेलिले रसुवाबाट वीर अस्पताल तीन जनालाई उद्धार गरेका छन्।
बाढी प्रभावित क्षेत्रमा थप उद्धार तथा राहत कार्य जारी रहेको प्रहरीले जनाएको छ।
प्रतिक्रिया दिनुहोस्