पोखरा । डा. मणिलाल भौमिक इन्टरनेसनल फाउन्डेसन, भारत र बतास फाउन्डेसन, नेपालले हालैको बाढी तथा प्राकृतिक विपद्बाट प्रभावित बालबालिकाको दीर्घकालीन पुनःस्थापना र भविष्य निर्माणका लागि सहकार्य गर्ने घोषणा गरेका छन्।
रसुवागढी नाका हुँदै विभिन्न क्षेत्रमा आएको विनाशकारी बाढी तथा प्राकृतिक प्रकोपबाट प्रभावित परिवारको अवस्था मध्यनजर गर्दै दुई संस्थाले विपद्का कारण अभिभावक गुमाएका बालबालिकालाई विशेष प्राथमिकता दिने भएका हुन्।
सहकार्यअन्तर्गत प्रकोपका कारण अभिभावक गुमाएका १०० भन्दा बढी बालबालिकालाई उच्च शिक्षाका लागि आवश्यक सहयोग उपलब्ध गराउने प्रतिबद्धता जनाइएको छ। आर्थिक कठिनाइका कारण प्रभावित बालबालिका विद्यालय तथा उच्च शिक्षा छाड्न बाध्य नहुन् भन्ने उद्देश्यले दीर्घकालीन शैक्षिक सहयोग कार्यक्रम अघि बढाउन लागिएको हो।
दुवै संस्थाले तत्कालीन राहत तथा उद्धारपछि पनि प्रभावित परिवारले जीविकोपार्जन, घर तथा सम्पत्तिको क्षति, आम्दानीका स्रोत अवरुद्ध हुनु र बालबालिकाको शिक्षामा बाधा पुग्नेजस्ता दीर्घकालीन चुनौती सामना गर्नुपर्ने बताएका छन्।
उनीहरूका अनुसार राहतले तत्कालको पीडा कम गर्न सक्ने भए पनि शिक्षाले बालबालिकाको जीवनको दिशा परिवर्तन गर्न सक्छ। त्यसैले यो कार्यक्रम छात्रवृत्तिमा मात्र सीमित नभई प्रभावित बालबालिकामा आत्मविश्वास, अवसर र भविष्यप्रतिको आशा पुनःस्थापित गर्ने दीर्घकालीन मानवीय लगानीका रूपमा अघि बढाइनेछ।
डा। मणिलाल भौमिक इन्टरनेसनल फाउन्डेसनले शिक्षा, विज्ञान तथा प्रविधि, स्वास्थ्य, महिला तथा बाल सशक्तीकरण र विपद् व्यवस्थापनका क्षेत्रमा काम गर्दै आएको छ। विश्वविख्यात भौतिकशास्त्री, लेजर वैज्ञानिक, लेखक तथा परोपकारी डा। मणिलाल भौमिकको मानवीय दर्शनबाट प्रेरित फाउन्डेसनले शिक्षा, वैज्ञानिक सोच, डिजिटल साक्षरता, स्वास्थ्य सेवा, सीप विकास तथा विपद् प्रतिकार्यलाई प्राथमिकतामा राख्दै आएको जनाएको छ।
यस्तै, बतास फाउन्डेसनले शिक्षा, स्वास्थ्य, खानेपानी तथा सरसफाइ, छात्रवृत्ति, विपद् राहत र समुदाय सशक्तीकरणका क्षेत्रमा काम गर्दै आएको छ। सीमान्तकृत तथा जोखिममा रहेका समुदायसम्म प्रत्यक्ष पहुँच पुर्याएर तत्कालीन तथा दीर्घकालीन सहयोग उपलब्ध गराउनु आफ्नो प्राथमिकता रहेको फाउन्डेसनले जनाएको छ।
हाल बाढी तथा प्राकृतिक प्रकोपबाट प्रभावित समुदायमा राहत, पुनःस्थापना र दीर्घकालीन सहयोगका आवश्यकता पहिचान गर्न विभिन्न सरोकारवालासँग सहकार्य भइरहेको बतास फाउन्डेसनले जनाएको छ।
दुवै संस्थाले भारत र नेपालबीचको ऐतिहासिक मित्रता तथा साझा मानवीय भावनालाई प्रतिबिम्बित गर्ने गरी सहकार्य अघि बढाइएको बताएका छन्। प्राकृतिक प्रकोपले भौगोलिक सीमा नचिन्ने भएकाले मानवीय सहयोग पनि सीमित हुन नहुने उनीहरूको भनाइ छ।
एक बालबालिकाको भविष्य सुरक्षित गर्नु एउटा परिवारको मात्र नभई सम्पूर्ण पुस्ताको भविष्य सुरक्षित गर्नु भएकाले शिक्षा र दीर्घकालीन पुनःस्थापनामा केन्द्रित भएर सहकार्य अघि बढाइने दुवै संस्थाले जनाएका छन्।‘नेपालका लागि सँगै, मानवताका लागि सँगै, भविष्यका लागि सँगै’ भन्ने मूल भावसहित यो सहकार्य अघि बढाइएको हो।
प्रतिक्रिया दिनुहोस्