काठमाडौं । इक्रा नेपालले सानिमा बैंक लिमिटेडका अधीनस्थ ऋणपत्रमा यसअघि प्रदान गरेको रेटिङ फिर्ता गरेको छ। बैंकको अनुरोधपछि इक्रा नेपालले ऋण रेटिङ विनियमावली, २०११ तथा आफ्नो रेटिङ फिर्ता नीतिअनुसार उक्त रेटिङ फिर्ता गरेको हो।
इक्रा नेपालका अनुसार सानिमा बैंकको करिब १ अर्ब ३५ करोड ५० लाख रुपैयाँ बराबरको अधीनस्थ ऋणपत्रको रेटिङ फिर्ता गरिएको छ। त्यस्तै, करिब ३ अर्ब ५ करोड २० लाख रुपैयाँ बराबरको अर्को अधीनस्थ ऋणपत्रमा भने रेटिङसम्बन्धी कारबाही गरिएको छ।रेटिङ फिर्ता हुनुअघि सानिमा बैंकका सम्बन्धित ऋणपत्रको रेटिङ ‘इक्राएनपी एलए–माइनस (नकारात्मक प्रभावसहित निगरानीमा) रहेको थियो।
इक्रा नेपालले रेटिङ फिर्ता गर्नुअघि उक्त रेटिङलाई छ महिनासम्म फिर्ताको सूचनामा राखेको जनाएको छ। पछिल्लो पटक रेटिङ समीक्षा गरिएको समयदेखि सानिमा बैंकको ऋण जोखिममा परिवर्तन भएको संकेत गर्ने कुनै जानकारी आफूहरूसँग नरहेको इक्रा नेपालले स्पष्ट पारेको छ। इक्रा नेपालका अनुसार बैंकको कार्यसम्पादन अनुगमनका लागि आवश्यक विस्तृत जानकारी प्राप्त गर्न प्रयास गरिएको थियो। तर, सानिमा बैंकले इक्रा नेपालबाट रेटिङ सेवा निरन्तरता नदिन अनुरोध गरेपछि रेटिङ फिर्ता गरिएको हो।
रेटिङ फिर्ता गरिएकाले यसपटक इक्रा नेपालले बैंकका प्रमुख रेटिङ निर्धारक, रेटिङ संवेदनशीलता तथा प्रमुख वित्तीय सूचकहरू सार्वजनिक गरेको छैन।सानिमा बैंकले सन् २००४ मा राष्ट्रियस्तरको ‘ख’ वर्गको विकास बैंकका रूपमा कारोबार सुरु गरेको थियो। सन् २०१२ को फेब्रुअरीमा ‘क’ वर्गको वाणिज्य बैंकमा स्तरोन्नति भएको बैंकका प्रमुख प्रवर्द्धकहरू गैरआवासीय नेपाली समुदायका व्यक्तिहरू रहेका थिए।
नेपाल स्टक एक्सचेन्जमा सूचीकृत सानिमा बैंकको बजार पुँजीकरण सन् २०२६ को सेप्टेम्बर मध्यसम्म करिब ५० अर्ब रुपैयाँ रहेको इक्रा नेपालले जनाएको छ।इक्रा नेपालले सानिमा बैंकका १० प्रतिशत सानिमा ऋणपत्र २०८५ र १० प्रतिशत सानिमा ऋणपत्र २०८७ सम्बन्धी रेटिङ प्रक्रिया अघि बढाएको थियो।
प्रतिक्रिया दिनुहोस्