काठमाडौं। सानिमा बैंकले ब्रिटिश इन्टरनेशनल इन्भेस्टमेन्टबाट १५ मिलियन अमेरिकी डलर व्यापार ऋण ल्याउने भएको छ ।
उक्त रकम सवा दुई खर्ब हुन आउँछ । बैंकले उक्त ऋणको लागि ब्रिटिश इन्टरनेशनल इन्भेस्टमेन्टसँग सम्झौता गरेको हो । सम्झौतामा सानिमा बैंकको तर्फबाट बैंकका प्रमुख कार्यकारी अधिकृत निश्चल राज पाण्डे र ब्रिटिश इन्टरनेशनल इन्भेस्टमेन्टका लगानी निर्देशक एडमिर इमामीले हस्ताक्षर गरे ।
सम्झौता अनुसार प्राप्त ऋण जलविद्युत् आयोजनाहरूको निर्माणमा प्रयोग हुने हाइड्रो मेकानिकल र इलेक्ट्रो मेकानिकल उपकरणहरूको आयात तथा निर्माण प्रक्रियाका लागि कच्चा पदार्थहरूको खरिदमा लगानी हुनेछ । उक्त साझेदारीले सानिमा बैंकको ‘ट्रेड फाइनान्स सर्भिस’ लाई महत्वपूर्ण योगदान पुर्याउने अपेक्षा गरिएको बैंकले जनाएको छ ।
उक्त साझेदारीले नेपालको उर्जा आवश्यकतालाई सम्बोधन गर्दै दिगो उर्जा स्रोतहरू परिचालन गर्न महत्वपूर्ण योगदान पुर्याउने विश्वास छ । बैंकले उक्त सम्झौता जैविक इन्धनको निर्भरता कम गर्न र जलवायु परिवर्तनसँग लड्न विश्वव्यापी प्रयासहरूमा केन्द्रित भएको उल्लेख गरेको छ ।
प्रतिक्रिया दिनुहोस्