एजेन्सी । होन्डुरसको क्यारेबियन टापु रोआटानबाट उड्ने क्रममा सोमबार सानो विमान दुर्घटना हुँदा कम्तीमा सात जनाको मृत्यु भएको अधिकारीहरूले बताएका छन् ।
दमकल विभागका मेजर विल्मर गुरेरोले विमान समुद्रमा खसेको र दुर्घटनास्थलबाट १० जनालाई निकालिएको जानकारी दिए । तीमध्ये ६ जनालाई अस्पतालमा मृत घोषित गरिएको उनले बताए ।
त्यसपछि समुद्रमा विमान नजिकै एक चालक दलको सदस्यको शव तैरिरहेको फेला परेको थियो । उक्त विमान किनारबाट करिब एक किलोमिटर टाढा दुर्घटनामा परेको थियो ।
अधिकारीहरूले विमानमा सवार व्यक्तिहरूको सङ्ख्याका बारेमा १७ वा १८ जना रहेको अपुष्ट विवरण दिएका छन् । गुरेरोले यात्रुहरूमध्ये एक ४० वर्षीय फ्रान्सेली नागरिकलाई सान पेड्रो सुला सहरको अस्पतालमा स्थानान्तरण गरिएको बताए ।
लान्सा एयरलाइन्सको विमान बे ले आइल्यान्ड्सको एक रोआटानबाट साँझमा उडान भरेको थियो र मूल भूमिमा रहेको ला सेइबा बन्दरगाहतर्फ जाँदै थियो । रोआटान होन्डुरसको मुख्य पर्यटकीय गन्तव्यहरू मध्ये एक हो ।
‘विमान झन्डै हामीमाथि खस्यो । म माछा मार्दै थिएँ’, एचसिएच टेलिभिजनलाई एक माझीले बताए ।
होन्डुरसका राष्ट्रपति सिओमारा क्यास्ट्रोले दुर्घटनाका पीडितहरूलाई सहयोग गर्न सशस्त्र बल, दमकल र अन्यहरू समावेश भएको आपत्कालीन समिति ‘तुरुन्तै सक्रिय’ गरेको बताए ।
ब्रिटिस निर्मित जेटस्ट्रीम ४१ मा ‘स्पष्ट यान्त्रिक खराबी’ का कारण दुर्घटना भएको प्रहरीले एक विज्ञप्तिमा जनाएको छ ।
प्रतिक्रिया दिनुहोस्