काठमाडौं । नेपाल राष्ट्र बैंकले बैंकिङ प्रणालीबाट आइतबार ३० अर्ब रुपैयाँ झिक्ने भएको छ । पछिल्लो समय बैंक तथा वित्तीय संस्थामा अधिक तरलता जम्मा भएसँगै केन्द्रीय बैंकले बैंकिङ प्रणालीबाट निरन्तर निक्षेप रकम झिक्दै आइरहेको छ ।
राष्ट्र बैंकले २१ दिनका लागि ३०अर्ब रुपैयाँ तान्न दिउँसो ३ बजेसम्म अनलाइन बोलकबोलको समय तोकेको छ । बैंक तथा वित्तिय संस्थाहरुले बोल गर्न सकिने रकम घटीमा १० करोड रुपैयाँ र बढीमा पाँच करोड रुपैयाँले भाग गर्दा आउने निःशेष भाग जाने गरी कुल रकम आह्वान गर्न सूचनामार्फत जानकारी गराएको छ ।
उक्त रकमको सावाँ तथा ब्याज भुक्तानी बैंकले आगामी असार १ गते उपलब्ध गराउने जानाएको छ । निक्षेप संकलनको बोलकबोल ब्याजदरमा गर्नुपर्नेछ भने बहुब्याजदरमा पनि बहुबोलकबोल गर्न सकिने केन्द्रीय बैंकले जनाएको छ ।
निक्षेप संकलन उपकरणको बोलकबोलमा राष्ट्र बैंकबाट इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन् ।
पछिल्लो समय केन्द्रीय बैंकले साताको दुई दिन आइतबार र बुधबार बजारबाट निरन्तर रुपमा तरलता खिच्दै आएको छ ।
प्रतिक्रिया दिनुहोस्