गोलन्जोरको सान बोटमै पहेँलपुर जुनार हेर्नुहोस् (तस्बिरहरु)

सिन्धुली । सिन्धुलीको जुनारलाई राष्ट्रिय तथा अन्तर्राष्ट्रिय स्तरमा प्रवर्द्धन गर्न जुनार मेला आयोजना गरिएको छ । सिन्धुली ‘गोलन्जोरको सान जुनार हाम्रो पहिचान, गोलन्जोरको जुनार समृद्विको आधार’ भन्ने नाराका साथ मंसिर २३–२५ गते (आज) सम्म बगैँचा स्थलमै पहिलो पटक जुनार प्रवर्द्धन मेला २०८२ आयोजना गरिएको हो ।

विज्ञापन

यहाँको मौलिक फलको रुपमा परिचित गोलन्जोर गाउँपालिकामा अवस्थित जुनार बगैँचामा कृषि पर्यटन प्रवद्र्वन गर्ने तथा स्थानीय रुपमा उत्पादित जुनारलाई राष्ट्रिय तथा अन्तर्राष्ट्रिय बजारमा चिनाउने उद्देश्यले मेलाको आयोजना गरिएको हो । पूर्वाधार विकास कार्यालय सिन्धुलीका कार्यालय प्रमुख लक्ष्मी प्रसाद सापकोटाले सिन्धुलीको जुनारलाई प्रवर्द्धन गर्नको लागि मेलाको आयोजना भएको बताए ।

उक्त मेलाले देशसँगै विश्वभर जुनारको प्रचार–प्रसार गर्न तथा उत्पादनलाई बजारसँग जोड्नको लागि महत्वपूर्ण भूमिका खेल्ने सापकोटाको भनाइ छ ।
उनले भने, ‘देशभर जुनारको लागि सिन्धुली प्रसिद्ध छ । जुनार फल्ने मुख्य ठाँउ भनेको गोलन्जोर गाउँपालिका हो। यहाँको जुनारको स्वाद र मिठास छुट्टै हुन्छ र यसलाई सबैमाझ चिनाउनको लागि र प्रवद्र्धन गर्नको लागि मेला आयोजना भएको हो । यसले समग्र देश र विश्वभर नै जुनारको प्रचार प्रसार गर्नको लागि र उत्पादनलाई बजारसँग जोड्नको लागि महत्वपूर्ण भूमिका खेल्ने हामीले महशुस गरेका छौं ।’

यस्तै, उनले उत्पादनलाई बजारसँग जोड्नका लागि सडकहरुको राम्रो व्यवस्था नभएको भन्दै सडकहरुलाई पक्की बनाउनुपर्ने माग गरे । सडक पूर्वाधार राम्रो भए उत्पादनलाई सहज रुपमा बजारसम्म पुर्याउन सकिने उनको धारणा छ । साथै, जुनार उत्पादक सहकारी संघका अध्यक्ष निर्मल कुमार रम्तेलले जुनारको खेती प्रवद्र्धन, उत्पादनलाई व्यवसायिक प्रवर्द्धनसँगै आन्तरिक पर्यटन प्रवद्र्धन गर्नका लागि गोलन्जोर गाउँपालिका वडा नं ४ मा जुनार प्रवर्द्धन मेला आयोजना गरेको बताए ।

उनले विभिन्न सरकारी निकाय, गैर सरकारी निकायहरु र विभिन्न दातृ निकायहरुको साझेदारीमा गोलन्जोर गाउँपालिकाले मेला आयोजना गरेको जानकारी दिँदै मेलाले वास्तवमै देश देखि विदेशसम्म रहेको सबैलाई यस क्षेत्रको उत्पादन आकर्षणबारे प्रचार गर्न सहज बनाएको बताए ।

तस्बिरः नेपाल न्यूज बैंक