काठमाडौं । प्रतिनिधिसभा सदस्य निर्वाचनमा काठमाडौं क्षेत्र नम्बर–१ बाट नवनिर्वाचित सांसद रञ्जु न्यौपानेले अब काम गरेर देखाउने बताएकी छन् ।
निर्वाचन आयोगबाट उनले प्रमाणपत्र लिन बाँकी रहेपनि फराकिलो मतान्तरले काठमाडौं निर्वाचन क्षेत्र नम्बर १ बाट रास्वपाका लागि पहिलो जित दर्ता गरेकी न्यौपानेले आफ्ना लागि यो जित महत्वपूर्ण हुनाका साथै चुनौतीपूर्ण पनि रहेको बताइन् ।
सुत्केरी भएको ११ औँ दिनमा सांसद निर्वाचित भएकी न्यौपानेले आज पत्रकार सम्मेलनमार्फत महत्वपूर्ण जित हासिल भएकाले अब काम गरेर देखाउने बताइन् । उनले रियल फाइट अब सुरु हुने भन्दै विवेकशील राजनीतिको जीत भएको बताइन्। उनले भनिन्, ‘यो जित हाम्रा लागि चुनौतीपूर्ण पनि छ। यस्तो महत्वपूर्ण जित हासिल भएकाले अब काम गरेर देखाउनैपर्छ । रियल फाइट त अब सुरु हुँदैछ । काठमाडौं–१ का हरेक मतदातालाई कृतज्ञता व्यक्त गर्न चाहन्छु । यो विवेकशील राजनीतिको पनि जीत हो ।’
विजय भएपछि उनले आफ्नो निर्वाचन क्षेत्रका मतदातालाई धन्यवाद ज्ञापन गरेकी छन् । उनले भनिन्, ‘यो निर्वाचन विशेष परिस्थितिमा भएको हो । उम्मेदवार र पार्टीले विशेष रणनीति लिएका थियौं। मतदाताले पनि विशेष रुपमा प्रतिक्रिया दिनुभएको स्पष्ट देखियो । ३५–३६ वर्षदेखि बारम्बार मतदाता नेपाली नागरिकलाई धोका दिनेहरुलाई ढोका बन्द गरिदिन्छौं भनेर मतदाताले भनिदिनुभयो । यो हाम्रो लागि निकै सुखद कुरा हो ।’
प्रतिक्रिया दिनुहोस्