बाजुरा । बाजुराको मार्तडी–कोल्टी सडकखण्ड अन्तर्गत बाउली खोलामा निर्माणाधीन पक्की पुल पाँच वर्षदेखि अलपत्र अवस्थामा छ । ठेकेदारको चरम लापरवाहीका कारण उक्त पुल करिब पाँच वर्षदेखि अलपत्र परेको हो ।
१६ महिनाभित्र सम्पन्न गरिसक्नुपर्ने पक्की पुल अहिलेसम्म निर्माण सम्पन्न नहुँदा वर्षेनी समस्या हुने गरेको छ । सुदुरपश्चिमको गौरवको आयोजनाको रुपमा रहेको मार्तडी–कोल्टी सडकखण्डको बाउलीमा पर्ने उक्त पुलको भौतिक प्रगति अहिलेसम्म २१ प्रतिशत मात्रै हुन सकेको छ ।
पुल निर्माणका लागि एकातर्फ सरिया हालेर थोरै ढलान गरिएको छ भने बाँकी काम अलपत्र छ । आरसीसी ब्रिज निर्माण सम्झौता भएको पाँच वर्षसम्मको भौतिक प्रगती लाजमर्दो छ । टीडीआर जुगल कौसिक जेभिले पुल निर्माणको जिम्मा लिएको थियो ।
०७९ फागुन १५ भित्र मोटरेबल पुल निर्माण सक्नेगरी २०७८ कार्तिक १५ गते टिडिआर जुगल कौशिक जेभीले ५ करोड ५८ लाख ८८ हजार २ सय ७० रुपैयाँमा सम्झौता गरेर निमार्णको जिम्मा लिएको थियो । तर निमार्णको जिम्मा लिएको करिब पाँच वर्ष बितिसक्दा पनि निर्माण कार्य कछुवा तालमा छ ।
पटकपटक म्याद थप गर्दा पनि पुल निर्माण कार्यले गति लिएको छैन् । हालसम्म ९० लाख ५६ हजारभन्दा बढी रकम भुक्तानी भइसकेको सडक डिभिजन कार्यालय अछामले जनाएको छ । जिल्ला प्रशासन कार्यालय बाजुराले अधुरा निर्माण कार्य शीघ्र सम्पन्न गराउन सम्बन्धित निकायसँग समन्वय भइरहेको जनाएको छ ।
चाडो सम्पन्न नगरे कारवाहीको चेतावनी
प्रशासन कार्यालय बाजुराले अलपत्र परेका योजना चाडो सम्पन्न गर्न ताकेता समेत गरेको छ। निर्माण कार्य अधुरा तथा अलपत्र योजनाहरु समयमै सम्पन्न आग्रह गरिएको हो।
साथै बाउली खोलामा निमार्णाधिन पूल अब समयमै सम्पन्न नगरे कारवाहीको चेतावनी दिएको छ ।
निर्माण कार्यमा ढिलाई भएपछि प्रमुख जिल्ला अधिकारी डोरेन्द्र निरौला, जिल्ला समन्वय समिति बाजुराका प्रमुख तुलसीराम रोकायासहितको टोलीले स्थलगत अनुगमन गर्दै निर्माण कम्पनीलाई समयमै काम सम्पन्न गर्न आग्रह गरेका छन्।
आगामी तीन महिनाभित्र उल्लेखनीय प्रगति नभए कानुनी कारबाही र कालोसूचीमा राख्ने चेतावनीसमेत दिइएको प्रमुख जिल्ला अधिकारी डोरेन्द्र निरौलाले जानकारी दिए। यसरी निर्माण कार्य अलपत्र हुँदा यहाँका नागरिकले बर्षेनी सास्ती खेप्नु परेको समेत बताएका हुन् ।
पुलको निर्माण कार्य समयमै सम्पन्न नहुँदा यहाँका स्थानीयलाई वर्षेनी समस्या हुने गरेको बडीमालिका नगरपालिका वडा नम्बर ७ का स्थानीय गणेशराज तिमिल्सेनाले गुनासो गरे ।
उनले भने,‘समयमै पूल नबन्दा बाजुराका चारवटा स्थानीय तहका नागरिक, बडीमालिका–७ र छिमेकी जिल्ला हुम्ला, मुगु, कालिकोटका नागरिकलाई सास्ती हुने गरेको छ ।’
प्रतिक्रिया दिनुहोस्