कर्पोरेट समाचार 
बाजुरा । बाजुराको कोल्टी बाटै नागरिकता वितरण कार्य प्रारम्भ भएको छ । इलाका प्रशासन कार्यालय कोल्टी बाटै नागरिकता वितरण भएपछि कुन्ना क्षेत्रका बासिन्दाले नागरिकताको लागि मार्तडीसम्म धाउने अवस्थाको अन्त्य भएको हो ।
दुर्गमका क्षेत्रका नागरिकलाई सहजता प्रदान गर्ने उद्देश्यसहित बाजुराको पूर्वी उत्तरी क्षेत्रको बुढी नन्दा नगरपालिका कोल्टीमा इलाका प्रशासन कार्यालय स्थापना गरी नागरिकता वितरण लगायतका कार्य सञ्चालन गरिएका छन् ।
यस अघि माथिल्लो क्षेत्रका नागरिक न्यूनतम १५ हजार खर्चेर नागरिकता लगायतका काममाज गर्ने मार्तडी पुग्ने गरेका थिए । अब त्यो झन्झटको अन्त्य भएको हो । बर्षातको समयमा माथिल्लो क्षेत्रका नागरिकलाई झनै सास्ती हुने गरेको थियो ।
नयाँ वर्षको अवसर पारेर कोल्टीमा वैशाख १ गते गृह मन्त्रालयका प्रशासन महाशाखाका प्रमुख काली प्रसाद पराजुलीले औपचारिक रूपमा कार्यालयको उद्घाटन गरेका थिए । कोल्टीमा इलाका प्रशासनसहित मालपोत र नापी कार्यालय समेत सञ्चालन ल्याइएको थियो ।
माथिल्लो क्षेत्रबाट नियमित सेवा प्रवाह हुँदा त्यहाँका नागरिकलाई नागरिकता लगायतका कामकाजमा सहजता थपिएको प्रमुख जिल्ला अधिकारी डोरेन्द्र निरौलाले बताए । इलाका प्रशासन कार्यालय कोल्टी बाट नागरिकता सेवा, राष्ट्रिय परिचय पत्र सङ्कलन लगायतका सेवा प्रवाहले दुर्गमका नागरिकलाई सदरमुकाम धाउनुपर्ने बाध्यताको अन्त्य भएको उनले जानकारी दिए ।
प्रतिक्रिया दिनुहोस्