काठमाडौं । नेपालको अग्रणी डिजिटल प्लेटफर्म डिजिओले दक्षिण एसियाली फुटबल महासंघ(साफ) महिला च्याम्पियनसिप २०२६ को नेपालका लागि आधिकारिक डिजिटल प्रसारण साझेदार बनेको घोषणा गरेको छ । प्रतियोगिता आउँदो जेठ ११ देखि २२ गतेसम्म भारतमा आयोजना हुँदैछ ।
यसअघि पनि डिजिओ ले फिफा विश्वकप २०२६ को नेपालका लागि आधिकारिक डिजिटल प्रसारण अधिकार प्राप्त गरिसकेको छ । लगातार ठूला खेलकुद प्रतियोगिताको प्रसारण अधिकार हात पारेसँगै डिजिओले नेपालमा डिजिटल खेल प्रसारणको दायरा विस्तार गरेको जनाएको छ ।
डिजिओ का स्पोर्ट्स हेड बिपुल भट्टराईका अनुसार महिला साफ च्याम्पियनसिपको डिजिटल अधिकार प्राप्त गर्नु नेपाली फुटबल समर्थकका लागि महत्वपूर्ण उपलब्धि हो । ‘यो प्रतियोगिता नेपालमा डिजिटल रूपमा डिजिओ मा उपलब्ध हुनेछ,’ उनले भने ।
उनका अनुसार डिजिओ ले खेलकुद सामग्रीको बलियो ‘पूल’ तयार गरेको छ, जहाँ दर्शकले स्थानीय फुटबलको लोकप्रियता, फिफा विश्वकपको विश्वव्यापी आकर्षणदेखि सिएभिए भलिबलको रोमाञ्चसम्म एकै प्लेटफर्ममा ‘ब्याक-टु-ब्याक’ हेर्न पाउनेछन् । ‘महिला फुटबलको दक्षिण एसियाली महाकुम्भलाई घर–घरमा पुर्याउन पाउँदा हामी गौरवान्वित छौँ,’ उनले भने ।
डिजिओले यसलाई नेपालको डिजिटल मनोरञ्जन र खेलकुद प्रसारण क्षेत्रमा नयाँ चरणको सुरुआतका रूपमा व्याख्या गरेको छ । प्लेटफर्मका अनुसार खेलप्रेमीले अब लगातार ठूला प्रतियोगिताको रोमाञ्च एउटै एपमार्फत अनुभव गर्न पाउनेछन् ।
प्रतिक्रिया दिनुहोस्