सिद्धार्थनगर (भैरहवा)। सिद्धार्थ राजमार्गअन्तर्गत निर्माणाधीन बुटवल–पाल्पा सुरुङमार्ग आगामी असोजदेखि सञ्चालनमा ल्याउने लक्ष्यसहित निर्माण कार्य तीव्र पारिएको छ ।
आयोजनाले सुरुङमार्गभित्रका संरचना, पहुँच सडक तथा सुरक्षा व्यवस्थासम्बन्धी कामलाई एकसाथ अघि बढाइएको जनाएको छ । हालसम्म आयोजनाको भौतिक प्रगति ६८ प्रतिशत र वित्तीय प्रगति ५८ प्रतिशत पुगेको छ । पाँच वर्षे निर्माण अवधिसहित सुरु गरिएको यो आयोजना ‘इन्जिनियरिङ, खरिद तथा निर्माण’ (इपिसी) मोडलमा निर्माण भइरहेको छ । यस मोडलअन्तर्गत डिजाइन, स्वीकृति तथा निर्माणको सम्पूर्ण जिम्मेवारी निर्माण कम्पनीकै हुने व्यवस्था गरिएको छ ।आयोजनाका प्रमुख राजेश पौडेलले आगामी असोजसम्म सुरुङमार्गबाट यातायात सञ्चालन गर्ने लक्ष्यअनुसार कामलाई तीव्रता दिइएको जानकारी दिए ।
उनका अनुसार निर्माण सम्पन्न भएपछि पाँच वर्षसम्म निर्माण कम्पनीले सञ्चालन, मर्मतसम्भार तथा सुरक्षाको जिम्मेवारी बहन गर्नेछ । त्यसपछिको थप पाँच वर्ष ‘डिएलपी’ अवधिका रूपमा रहने व्यवस्था गरिएको छ । आयोजनाको प्रारम्भिक चरणमा कानुनी तथा प्राविधिक जटिलताका कारण निर्माण प्रभावित भएको थियो । नेपालमा इपिसी मोडलको नयाँ अभ्यास भएकाले आवश्यक कागजात व्यवस्थापन, रुख कटान अनुमति तथा बजेट व्यवस्थापनमा समस्या देखिएको आयोजनाले जनाएको छ ।
हाल ती समस्या समाधानतर्फ उन्मुख रहेको र म्याद थप तथा निर्माण चरण समायोजन प्रक्रिया अन्तिम चरणमा पुगेको पौडेलले बताए । सुरुङमार्गसँगै निर्माण भइरहेको पहुँच सडकमा ‘रिजिड पेभमेन्ट’ गर्ने स्वीकृति प्राप्त भइसकेको छ । सुरुङमार्ग सञ्चालनपछि बाहिरी जोखिमयुक्त क्षेत्रमा ढुंगाखस्ने जोखिम नियन्त्रण तथा भिर संरक्षणसम्बन्धी काम गरिने आयोजनाले जनाएको छ ।
पैदलयात्रीका लागि सुरक्षित मार्ग निर्माण गरिने तथा बाहिरी क्षेत्रमा खानेपानी व्यवस्थापनसमेत गरिने योजना रहेको छ । आयोजनाको प्रारम्भिक लागत अनुमान करिब १० अर्ब रुपैयाँ रहे पनि प्रतिस्पर्धात्मक ठेक्का प्रक्रियामार्फत करिब सात अर्ब रुपैयाँमा सम्झौता गरिएको हो । सिद्धार्थ राजमार्गको उक्त खण्ड पहिरो तथा भूक्षयका दृष्टिले जोखिमयुक्त भएकाले सुरक्षित यात्रा सुनिश्चित गर्नु र जनधनको क्षति न्यूनीकरण गर्नु सुरुङमार्ग निर्माणको मुख्य उद्देश्य रहेको आयोजनाले जनाएको छ ।
प्रतिक्रिया दिनुहोस्