काठमाडौं । शिक्षा विज्ञान तथा प्रविधि मन्त्रालयले विद्यार्थीमाथि यातना दिनेलाई हदैसम्मको कारबाही गर्न निर्देशन दिएको छ ।मन्त्रालयले बिहीबार प्रेस विज्ञप्ति जारी गर्दै अभिभावक, स्थानीय प्रशासन र सरोकारवालालाई यस्तो निर्देशन दिएको हो ।
तनहुँको भिमादस्थित प्रभात एकेडेमी बोर्डिङका लेखापालले तीनजना विद्यार्थीमाथि गालामा तातो पन्युले डामेको तथा नवलपरासी पश्चिमको एच पाठशालामा शिक्षकले यातना दिएर विद्यार्थीको आँखा फुटेको घटनामा मन्त्रालयले गम्भीर ध्यानाकर्षण भएको उल्लेख गरेको छ । विद्यालयमा बालबालिकालाई दिइने याताना बालअधिकार र कानून विपरित भएको उल्लेख गर्दै मन्त्रालयले विद्यालय परिसरभित्र हुने हिंसात्मक कार्यको निगरानी गरी दोषीलाई कानूनी कारबाहीको दायरामा ल्याउन अभिभावक, स्थानीय प्रशासन र सरोकारवालालाई अनुरोध गरेको छ ।
यस्तै, दक्षिणकाली काठमाडौंको जुनकिरी स्कुल तथा शंखरापुरमा एचएस एकेडेमीको बस दुर्घटना भई विद्यार्थीको मृत्यु भएको घटनामा तत्काल छानबिन गर्न पनि मन्त्रालयले प्रहरीलाई आग्रह गरेको छ ।
सवारी साधनको मापदण्ड ‘स्कुल बस निर्देशिका २०४७’ अनुसार पालना गर्न मन्त्रालयको निर्देशन दिएको छ ।
प्रतिक्रिया दिनुहोस्