कर्पोरेट समाचार 
लन्डन । युक्रेनमा जारी युद्ध अन्त्यका लागि अमेरिका, बेलायत, युक्रेन तथा युरोपेली राष्ट्रहरूबीच नयाँ चरणको वार्ता बुधबार लन्डनमा सुरु हुँदैछ। अमेरिकी राष्ट्रपति डोनाल्ड ट्रम्पको पहलमा सुरु भएको यो पहल हालैका दिनहरूमा भएको कूटनीतिक सक्रियताको निरन्तरता हो।
ह्वाइट हाउसले अमेरिकी राष्ट्रपति दूत स्टिभ विटकफको यस हप्ता हुने मस्को भ्रमण पुष्टि गर्दै शान्तिप्रक्रियामा नयाँ ऊर्जा थपिने अपेक्षा गरेको छ। ट्रम्पको कार्यकालमा यो उनको चौथो रूस भ्रमण हुनेछ।
यसैबीच, अमेरिकी सञ्चार माध्यमहरूका अनुसार ट्रम्पले क्रिमियालाई रूसी क्षेत्रका रूपमा मान्यता दिने तयारी गरिरहेको खबर बाहिरिएको छ। सो प्रस्ताव गत हप्ता पेरिसमा भएको युरोपेली बैठकमा पहिलो पटक प्रस्तुत गरिएको थियो।
दबाब र धम्कीबीचको कूटनीति
अमेरिकी विदेशमन्त्री मार्को रुबियोले पेरिस बैठकमा युद्ध अन्त्य गर्ने योजनाको रूपरेखा प्रस्तुत गरे पनि विस्तृत विवरण सार्वजनिक गरिएको छैन। बैठकपछि रुबियोले आफ्ना रूसी समकक्षी सर्गेई लाभारोभसँग पनि टेलिफोन वार्ता गरेका थिए।
राष्ट्रपति ट्रम्प र रुबियो दुवैले यदि वार्तामा द्रुत प्रगति नभए अमेरिका शान्ति प्रक्रियाबाट बाहिरिन सक्ने चेतावनी दिइसकेका छन्। ट्रम्पका प्रवक्ता क्यारोलिन लेभिटका अनुसार ‘उहाँ दुवै पक्षको हताहती अन्त्य गर्न चाहनुहुन्छ र यस युद्धप्रति निकै निराश हुनुहुन्छ।’
लन्डन वार्ताको संरचना
बेलायती विदेशमन्त्री डेभिड लामीको नेतृत्वमा हुने लन्डन वार्ता पेरिसको तुलनामा केही निम्न तहको भए पनि यसमा महत्त्वपूर्ण अधिकारीहरू सहभागी हुनेछन्।
युक्रेनतर्फबाट राष्ट्रपति जेलेन्स्कीका प्रमुख स्टाफ एन्ड्री येरमाक, विदेशमन्त्री एन्ड्री सिबिगा र रक्षामन्त्री रुस्तेम उमेरोभ सहभागी हुनेछन्। अमेरिकी तर्फबाट युक्रेन दूत किथ केलोग तथा फ्रान्सको तर्फबाट राष्ट्रपति म्याक्रोनका सल्लाहकार इमानुएल बोन सहभागी छन्।
बेलायती रक्षामन्त्री जोन हिलीका अनुसार मन्त्रीहरू ‘युद्धविराम कस्तो देखिन सक्छ र दीर्घकालीन शान्ति कसरी सुनिश्चित गर्ने’ भन्ने विषयमा छलफल गर्नेछन्।
शान्तिको आशा, तर अझै अनिश्चितता
ट्रम्पले मार्चमा बिना शर्त युद्धविरामको प्रस्ताव राखे पनि पुटिनले अस्वीकार गरिसकेका छन्। यद्यपि ३० दिनका लागि ऊर्जा पूर्वाधारमाथिको आक्रमण रोक्ने छुट्टाछुट्टै सम्झौताले आशाको झिल्को दिएको थियो, जुन अहिले समाप्त भइसकेको छ। युरोपेली नेताहरूले अमेरिका पछि हटेमा युक्रेनलाई कसरी समर्थन गर्ने भन्ने विषयमा वैकल्पिक रणनीतिहरूमा कार्य गर्दै आएका छन्।
फ्रान्सेली विदेशमन्त्री जिन–नोएल बारोटले भने, ‘युरोप निर्णय प्रक्रियाबाट बाहिर राखिने डरका बीच पेरिस बैठक सफल रह्यो, अब लन्डन वार्तामा त्यो प्रयासलाई अझ सुदृढ बनाउने छ।
प्रतिक्रिया दिनुहोस्