कर्पोरेट समाचार 
नवलपरासी । प्रतिनिधिसभा सांसद विनोद चौधरीको निर्वाचन क्षेत्रमा ३१ करोड बढि बजेट विनियोजन भएको छ । सांसद चौधरीको निर्वाचन क्षेत्र समेत रहेको पश्चिम नवलपरासी १ मा उनकै पहलमा शहरी विकास मन्त्रालयअन्तर्गत बजेट विनियोजन गरिएको हो ।
आगामी आर्थिक वर्ष २०८२/ ०८३ का लागि शहरी विकास मन्त्रालयअन्तर्गत विभिन्न शीर्षकमा बजेट विनियोजन भएको छ । पश्चिम नवलपरासी १ को पूर्वाधार विकास, सहरी सौन्दर्यकरण र विपन्न परिवारका लागि आवास निर्माण लगायतका परियोजनामा बजेट विनियोजन गरिएको बताइएको छ। यस्तै, एकीकृत बस्ती विकास (सुस्ता), सडक निर्माण, आपतकालीन आवास भवन र पार्क लगायतका पूर्वाधार सुधारका लागि १ करोड ६ लाख रुपैयाँ रकम शहरी विकास मन्त्रालयमार्फत दिइएको हो ।
प्रतापपुर र सरावल गाउँपालिकाका गरिब तथा विपन्न परिवारका लागि आवास पूर्वाधार निर्माणमा ३ करोड रुपैयाँ बजेट छुट्ट्याइएको छ । सडक पूर्वाधार विकासतर्फ बर्दघाट नगरपालिका वडा नं ४ मा रहेको बिषय खोला दुवैतर्फ सडक स्तरोन्नतिका लागि ३ करोड, पोटाहादेखि पश्चिमतर्फ अन्नपूर्ण सिँचाइ बोरिङ हुँदै चौपत्ता पशु बजार त्रिवेणी जोड्ने सडक निर्माण (बर्दघाट नगरपालिका १४ र १५) का लागि पनि ३ करोड, बर्दघाट टिसिएन चोकदेखि जिमिरेभार हुँदै नारायणचोकसम्म ५ किलोमिटर सडक विस्तार तथा सौन्दर्यीकरणका लागि ३ करोड रुपैयाँ छुट्ट्याइएको छ ।
बजेटमा सूर्यपुरादेखि भुजहवा जोड्ने बाटो स्तरोन्नति र कालोपत्रे (प्रतापपुर वडा नं ७) सरावल का लागि ३ करोड, सरावल गाउँपालिका, बर्दघाट नगरपालिका वडा नं.१ को सिमानादेखि सरावल सालवास, पथरहिया, सिमलटाडी र नयाँटोल हुँदै सुनवल वडा नं ११ जोड्ने सडक स्तरोन्नतिका लागि ३ करोड रुपैयाँ बजेटमा सुनिश्चित गरिएको छ ।
यसैगरी, प्रतापपुरदेखि बेलाटारी जोड्ने ठूलो सडकमा पुल निर्माणका लागि ३ करोड, फडकी टोल बलिनगर डङेनमा पुल निर्माण (प्रतापपुर ८) का लागि ३ करोड रुपैयाँ छुट्ट्याइएको छ ।
सहरी विकास र सौन्दर्यीकरणतर्फ बर्दघाटको नारायणचोक, गोपीगञ्ज, सेमरी, बेलाटारी, कुडियासम्मको बजार क्षेत्रमा १३ किलोमिटरको एक सय स्थानमा फ्लड लाइट, सडक पेटीमा वृक्षारोपण र सौन्दर्यीकरणका लागि पनि ३ करोड रुपैयाँ बिनियोजना गरिएको छ । यसमा बर्दघाट, प्रतापपुर र सुस्ता गाउँपालिका समेटिनेछन्।
पर्यटन पूर्वाधारतर्फ, खोला सिमसार पर्यापर्यटन विकासका विभिन्न संरचना निर्माण (बर्दघाट १०) का लागि ३ करोड रुपैयाँ विनियोजन भएका छभने बर्दघाट नयाँ शहर जग्गा एकीकरण कार्यको सम्भाव्यता अध्ययन गरी डिपिआर तयार गर्न ९ लाख रुपैयाँ छुट्ट्याइएको छ ।
विकासका लागि राजनीति भन्ने नाराका साथ पश्चिम नवलपरासी १ बाट प्रतिनिधि सभा सदस्यमा निर्वाचित चौधरीले आफ्नो क्षेत्रको विकासका लागि ३१ करोड बढी रकम विनियोजन गराएका छन् । बजेट विनियोजनका लागि उनले तीन तहकै सरकारसँग आवश्यक पहल र समन्वयको काम गर्दै आएको उल्लेख छ ।
प्रतिक्रिया दिनुहोस्