कर्पोरेट समाचार 
दमौली (तनहुँ) । जिल्ला प्रशासन कार्यालयले चालु आर्थिक वर्षको पहिलो त्रैमासिकमा एक करोडभन्दा बढी राजस्व सङ्कलन गरेको छ । प्रमुख जिल्ला अधिकारी रामकृष्ण अधिकारीले सङ्घसंस्था दर्ता र नवीकरण, हातहतियार नवीकरण र नामसारी, राहदानी दस्तुरलगायतबाट एक करोड १८ लाख १५ हजार ८८५ रुपैयाँ राजस्व सङ्कलन भएको जानकारी दिए ।
उनका अनुसार सङ्घसंस्था दर्ता नवीकरणबाट दुई लाख पाँच हजार ७००, हातहतियार नवीकरण र नामसारीबाट तीन लाख दुई हजार २५०, राहदानी दस्तुरबाट एक करोड ११ लाख ५८ हजार, न्यायिक दण्ड जरिवानाबाट एक लाख ३५ हजार ४३५ रुपैयाँ राजस्व सङ्कलन भएको छ ।
४३४ गुनासा फछ्र्यौट
चालु आवको पहिलो त्रैमासिकमा जिल्ला प्रशासन कार्यालयमा ६१९ गुनासो दर्ता भएका छन्। विभिन्न माध्यमबाट कार्यालयमा गुनासो दर्ता गरिएको हो। प्रजिअ अधिकारीले सबैभन्दा बढी नागरिक एपमार्फत ५७२ गुनासो प्राप्त भएको जानकारी दिए । त्यस्तै कार्यालयमा निवेदनमार्फत ३४ र निमायक निकायबाट १३ गुनासो प्राप्त भएको उनले बताए । गुनासोमध्ये ४३४ गुनासो फछ्र्यौट गरिसकिएको उनको भनाइ छ।
सेवाग्राहीका सहजताका लागि कार्यालयले क्युआरकोडमार्फत गुनासो दर्ता गर्न सक्ने व्यवस्था गरेपनि क्युआरकोडमार्फत कुनै पनि गुनासो नआएको प्रजिअ अधिकारीले बताए । त्यस्तै हेलो सरकारमार्फत पनि गुनासो प्राप्त भएको छैन । प्रजिअ अधिकारीका अनुसार नागरिक एपमार्फत प्राप्त गुनासोमध्ये ३८७, कार्यालयमा निवेदन प्राप्तमध्ये ३४ र निमायक निकायमार्फत प्राप्त गुनासोमध्ये १३ गुनासो फछ्र्यौट भएका छन् । रासस
प्रतिक्रिया दिनुहोस्