रामेछाप। रामेछापको सदरमुकाम मन्थली नजिक तामाकोसी नदीमा बस दुर्घटना हुँदा १२ जनाको मृत्यु भएको छ। ६ जनाको उपचारका क्रममा अस्पतालमा निधन भएको र ६ वटा शव घटनास्थलमा फेला परेको हो।
मृतक १२ जनामध्ये १० जनाको सनाखत भएको छ। मृत्यु हुनेमा रामेछापको लिखु तामाकोशी गाउँपालिका–७ का भीमबहादुर तामाङ, सोही वडाकी सानुमाया तामाङ, रमिता तामाङ र तारा तामाङ रहेका छन् । यस्तै, लिखु तामाकोशी–४ की बबी तामाङ र दीपेन्द्र बस्नेत, लिखु तामाकोशी–६ का दीपेश बस्नेत र लिखु–६ कै मानकुमारी बरुवाल रहेका छन् । यसैगरी, सिन्धुलीको गोलन्जोर गाउँपालिका–६ का शिव श्रेष्ठ र दोलखाको भीमेश्वर नगरपालिका–८ का मानबहादुर तामाङ रहेको मन्थली अस्पतालका मेडिकल सुपरिटेन्डेन्ट डा केशवसिंह धामीले जानकारी दिए । मृतक दुई जनको सनाखत हुन बाँकी रहेको उनले बताए ।
रामेछापका प्रहरी नायव उपरीक्षक भोला भट्टका अनुसार उक्त दुर्घटनामा बसका चालकसहित ८ जना घाइते भएका थिए। घाइतेको खुर्कोटस्थित शुभ जीवन अस्पताल, मन्थली अस्पताल र तामाकोशी अस्पतालमा उपचार भइरहेको छ। बस चालकलाई प्रहरीले नियन्त्रणमा लिएको उनले बताए । बसका बाँकी यात्रुको अझै खोजतलाश जारी रहेको प्रहरीले जनाएको छ ।
काठमाडौँबाट ओखलढुङ्गा जाँदै गरेको अरनिको यातायातको ०१–००५ ख ९९७५ नम्बरको बस आज बिहान रामेछाप मन्थली नगरपालिका–६ मसानटारस्थित सडकबाट करिब एक सय मिटर तल तामाकोशी नदीमा खसेको थियो ।
प्रतिक्रिया दिनुहोस्