सर्लाही । सर्लाहीको धनकौल गाउँपालिकामा निःशुल्क सञ्चालित एम्बुलेन्स सेवाप्रति स्थानीयले असन्तुष्टि जनाएका छन् । आवश्यक परेको समयमा एम्बुलेन्स उपलब्ध नभएको र सेवामा लापरबाही भएको भन्दै सेवाग्राहीले गुनासो गरेका हुन् ।
मधेस प्रदेश ०७–००१ झा ०००५ नम्बरको एम्बुलेन्सका चालक जितेन साहमाथि मनोमानी गर्ने र गलत जानकारी दिने आरोप लागेको छ । केही दिनअघि एक स्थानीयले आफन्त बिरामी परेपछि एम्बुलेन्सका लागि चालक साहसँग सम्पर्क गरेका थिए । तर, उनले आफू एम्बुलेन्ससहित सदरमुकाम मलंगवा गएको जानकारी दिएका थिए ।
तर ती स्थानीय बिरामीलाई लिएर धनकौल बजार पुगेपछि सोही समयमा एम्बुलेन्स गाउँपालिकाको कार्यालय अगाडि नै रहेको देखिएको थियो । अन्य व्यक्तिसँग बुझ्दा पनि उक्त दिन एम्बुलेन्स कतै बाहिर नगएको पुष्टि भएको स्थानीयको भनाइ छ ।
ती स्थानीयका अनुसार त्यसपछि चालकसँग सम्पर्क गर्न खोज्दा उनले फोन नउठाएको र पछि एम्बुलेन्स रहेको स्थानमा पुगेपछि दुवै पक्षबिच विवादसमेत भएको बताइएको छ । उक्त भिडियो अहिले सामाजिक सञ्जालमा ‘भाईरल’ भइरहेको छ ।
घटनाबारे धनकौल गाउँपालिकाका प्रमुख प्रशासकीय अधिकृत हरि ओम प्रसाद जयसवालले आफूलाई यसबारे जानकारी नभएको बताए । ‘अहिलेसम्म कसैले औपचारिक रूपमा जानकारी गराएको छैन। अब यस विषयमा बुझेर आवश्यक प्रक्रिया अघि बढाउँछौँ,’ उनले नेपाल न्यूज बैंकसँग भने ।
चालक साहसँग प्रतिक्रिया लिन खोज्दा उनले आफू व्यस्त रहेको भन्दै पछि कुरा गर्ने बताएका थिए । त्यसपछि पटक–पटक सम्पर्क गर्दा पनि उनले फोन उठाएनन् । स्थानीयले एम्बुलेन्स जस्तो संवेदनशील सेवामा लापरबाही हुनु गम्भीर विषय भएको भन्दै छानबिन गरी दोषीमाथि कारबाही गर्न माग गरेका छन् ।
प्रतिक्रिया दिनुहोस्