सुकुमवासी बस्ती हटेपछि बाढीजन्य जोखिम घट्ने महानगरको दाबी

काठमाडौं । काठमाडौं महानगरपालिकाले नदी किनाराका सुकुमवासी बस्ती हटाइएपछि यस वर्ष नदीजन्य विपद्का घटनामा कमी आउने अपेक्षा गरेको छ । कामपा–११, १४, ३१ र ३२ आसपासका नदी किनार क्षेत्रमा बसेका नागरिक हटाइएपछि बाढीजन्य जोखिम कम हुने महानगरको विश्वास छ ।

विज्ञापन

महानगरका नगर प्रहरी वरिष्ठ उपरीक्षक विष्णुप्रसाद जोशीका अनुसार विगतका वर्षमा नदी आसपासका क्षेत्रमा बाढीजन्य घटना बढी हुने गरेका थिए । ‘उक्त स्थानमा रहेको बसोबास हटाइएपछि यस वर्ष एक–दुई स्थानमा छिट्फुट घटनाबाहेक नदीजन्य विपद्का घटनामा कमी आउने विश्वास छ,’ उनले भने । उनका अनुसार सामाखुसीदेखि खाडीपाखासम्मको क्षेत्रमा भने अझै विशेष सावधानी अपनाउनुपर्ने अवस्था रहेको छ । बर्खाको समयमा हुन सक्ने पानीजन्य अन्य जोखिम न्यूनीकरणका लागि महानगरले जोखिमयुक्त स्थान पहिचान गरी रणनीतिक योजना तयार गरेको उनले जानकारी दिए ।

महानगरले सहरी विपद् जोखिम न्यूनीकरणका लागि पूर्वतयारी, विपद्का बेला आवश्यक व्यवस्थापन र विपद्पछिको पुनःस्थापनासम्बन्धी कामलाई योजनामा समेटेको जनाएको छ । वडा र समुदायस्तरमा क्षमता विकास, आन्तरिक तथा साझेदार निकायबीच समन्वय गर्ने विषयलाई पनि योजनामा प्राथमिकता दिइएको छ ।

जोशीका अनुसार सहर सुरक्षित बनाउन सहभागितामूलक संयन्त्र निर्माण आवश्यक छ । सामूहिक ज्ञान, सीप र सोच विकासमार्फत जोखिम न्यूनीकरण गर्ने उद्देश्यसहित रणनीतिक योजना बनाइएको उनले बताए । आगामी वर्षदेखि उक्त योजना कार्यान्वयनमा ल्याइने र त्यसअनुसार कार्यक्रम तथा बजेट प्रस्ताव गरिने तयारी रहेको छ । विपद् व्यवस्थापनका लागि पूर्वतयारी संयन्त्र, पालिका र वडास्तरीय समन्वय तथा प्रभावकारी सेवा सञ्चालनबारे पनि छलफल भइसकेको उनले जानकारी दिए । ‘वडास्तरीय विपद् व्यवस्थापनका लागि पूर्वाधार विकासजन्य जोखिमको पूर्वानुमान र केन्द्र तथा वडास्तरको क्षमता विकास गर्ने नीति आवश्यक छ,’ उनले भने ।

सहरको प्रमुख जोखिम आगलागी रहेको उल्लेख गर्दै जोशीले विद्युत्जन्य आगलागीको जोखिम बढ्दै गएको बताए । ‘आगलागीको खबर आएको आधा मिनेटभित्र दमकल स्टेसनबाट निस्किने गरेका छन्, तर सडकमा अत्यधिक यातायात चापका कारण गन्तव्यमा पुग्न कठिन हुने गरेको छ,’ उनले भने ।