काठमाडौं। अब देशभरका रक्तसञ्चार केन्द्रमा उपलब्ध रगतको मौज्दात नागरिक एपमार्फत नै हेर्न सकिने भएको छ । नागरिक एपमा ‘रक्त सूचना’ पोर्टल थपिएसँगै प्रयोगकर्ताले विभिन्न केन्द्रमा कुन रक्त समूहको रगत कति युनिट उपलब्ध छ भन्ने जानकारी वास्तविक समयमा प्राप्त गर्न सक्ने भएका हुन् ।
स्वास्थ्य तथा जनसंख्या मन्त्रालयअन्तर्गत स्वास्थ्य सेवा प्रणालीलाई थप प्रभावकारी र प्रविधिमैत्री बनाउने उद्देश्यले उक्त सेवा सञ्चालनमा ल्याइएको जनाएको छ । यसमार्फत देशभरका रक्तसञ्चार केन्द्रमा उपलब्ध विभिन्न रक्त समूहको विवरण एकीकृत रूपमा हेर्न सकिनेछ ।
मन्त्रालयका अनुसार नयाँ सेवाले आकस्मिक अवस्थामा रगत खोज्नुपर्ने बिरामी, उनका परिवार तथा स्वास्थ्य संस्थालाई आवश्यक जानकारी छिटो उपलब्ध गराउनेछ । यसले रगतको खोजीमा हुने समयको बचत गर्नुका साथै रक्त व्यवस्थापन र रक्तसञ्चार सेवाबीचको समन्वयलाई समेत थप सहज बनाउने अपेक्षा गरिएको छ ।
सरकारले पछिल्ला वर्षहरूमा नागरिक एपमार्फत विभिन्न सार्वजनिक सेवाहरूलाई एकीकृत गर्दै सेवा प्रवाहलाई सहज, पारदर्शी र डिजिटल बनाउने प्रयास गरिरहेको छ । ‘रक्त सूचना’ सेवा थपिएसँगै स्वास्थ्य सेवाको डिजिटल पहुँच विस्तारमा थप सहयोग पुग्ने विश्वास गरिएको छ ।
प्रतिक्रिया दिनुहोस्