काठमाडौं । नेपाली संगीत उद्योगका लोकप्रिय संगीतकर्मी प्रदिप भट्टराईले नयाँ गीत ‘उमेर ढल्केको’को म्युजिक भिडियो सार्वजनिक गरेका छन् ।
नेपाली संगीत क्षेत्रमा २५ वर्षभन्दा बढी समय बिताइसकेका उनको परिचय गायक, संगीतकार, गीतकार तथा संगीतकर्मीका रूपमा स्थापित रहेको छ । भट्टराईले आफ्नो सांगीतिक यात्राको सुरूवात २५ बर्ष अघि मेलान्ज ब्याण्ड मार्फत गरेका थिए ।
आज सार्वजनिक भएको नयाँ गीतमा नेपाल आइडल सिजन २ का विजेता रवि ओडले स्वर दिएका छन् । ‘उमेर ढल्केको’मा उनले आफ्नो भावनात्मक प्रस्तुतिमार्फत गीतलाई अझ बढी सजीव तुल्याएका छन् । गीतको भिडियोमा रबीको आवाज संगै कलाकार जय किशन बस्नेत र बिना राउत तथा संगीतकार स्वयं भट्टराईलगायतका कलाकारको रमाइलो अभिनय छ ।
काठमाडौंको एक होटलमा आयोजित एक कार्यक्रममा गीत सार्वजनिक गरिएको थियो । कार्यक्रममा बोल्दै भट्टराईले आफ्नो नयाँ सिर्जनाबारे उत्साह व्यक्त गरे । यस गीतले समयसँगै परिवर्तन हुने जीवनका भोगाइहरू चित्रण गरेको उनले प्रस्ट पारे । उक्त गीतको भिडियो नेपाल आइडलका सिजन २ का विजेता सकेत रहेका रवि ओडको आधिकारिक युट्युब च्यानलमार्फत सार्वजनिक गरिएको छ ।
संगीतकर्मी भट्टराईले नेपाली संगीतमा आफ्नै मौलिक शब्द, संगीत र शैलीले छुट्टै पहिचान बनाएका छन् । भट्टराईले यसअघि पनि आफ्नै शब्द र संगीतमा दुई एल्बम सार्वजनिक गरिसकेका छन् । उनका सिर्जनाहरू नेपाली लोकशैलीदेखि आधुनिक संगीतसम्म विविध स्वाद समेट्ने खालका छन् । उनका प्रायजसो गीतहरू प्रेम, जीवन र सामाजिक चेतनासँग जोडिएका विषयवस्तुहरूमा केन्द्रित हुने गर्छन् ।
प्रतिक्रिया दिनुहोस्