काठमाडौं । सरकारले बजारमा बिक्री गर्ने वस्तुमा लेबल नराखे कारबाही गर्ने चेतावनी दिएको छ ।
वाणिज्य, आपूर्ति तथा उपभोक्ता संरक्षण विभागले एक सूचना निकालेर बजारमा बिक्री गर्ने वस्तुमा लेबल राख्न चैत २० गतेसम्मको समय दिएको छ ।
स्वदेशमा उत्पादित वस्तु भए सम्बन्धित उत्पादकले र विदेशबाट ल्याइने वस्तु भए पैठारीकर्ताले आफ्ना वस्तुमा लेबल अनिवार्यरुपमा राखुपर्ने उल्लेख छ। लेबलमा उत्पादकको नाम, ठेगाना र दर्ता नम्बर, वस्तुको उत्पादन र उपभोग्य मिति र ब्याच नम्बर, वस्तुमा लाग्ने सबै प्रकारका कर समावेश गरी हुन आउने अधिकतम खुद्रा बिक्री मूल्य राख्नुपर्ने छ । । यस्तै, मानव स्वास्थ्यलाई प्रतिकूल असर पर्ने भए चेतनामूलक सन्देश, चित्र वा चिन्हको प्रयोग गर्न समेत भनिएको छ ।
सूचनालाई बेवास्ता वा अटेर गरी लेबलविनाका वस्तु बजारमा बिक्री प्रयोजनका लागि राखिएको भेटिए कारबाही गर्ने विभागले चेतावनी दिएको हो।
‘ बजारमा बिक्री वितरणमा पठाउनु अघि अनिवार्य रुपमा तयारी मालवस्तुमा लेबल लगाउनुहुन सम्पूर्ण उत्पादक, पैठारीकर्ता, व्यवसायी लगायत सरोकारवालालाई यो सूचना प्रकाशित गरिएको छ । यो सूचनाको वेवास्ता वा अटेर गरी लेबल बिनाका वस्तुहरु बजारमा बिक्री वितरण प्रयोजनका लागी राखिएको भेटिएमा प्रचलित कानून बमोजिम कारबाही हुने जानकारी गराइन्छ’ सूचनामा भनिएको छ ।
उपभोक्ता संरक्षण ऐन, २०७५ को दफा ६ को उपदफा ३ मा बजारमा बिक्री गरिने वस्तुमा सर्वसाधारणले बुझ्ने गरी नेपाली वा अंग्रेजी भाषामा अनिवार्य लेबल लगाउनु पर्ने कानुनी व्यवस्था छ।
प्रतिक्रिया दिनुहोस्