काठमाडौं । नेपाल दूरसञ्चार कम्पनी (नेपाल टेलिकम– एनटीसी) ले लाभांश वितरणको घोषणा गरेको छ । पुस ८ गते बसेको कम्पनी सञ्चालक समितिको बैठकले गत आर्थिक वर्ष २०८१/८२ को नाफाबाट हाल कायम चुक्ता पुँजीको करसहित ३० प्रतिशत नगद लाभांश शेयरधनिलाई वितरण गनेए प्रस्ताव गरेको हो ।
हाल कम्पनीको चुक्ता पुँजी १८ अर्ब रुपैयाँ कायम छ । कम्पनीले ३० प्रतिशतका दरले हुन आउने ५ अर्ब ४० करोड रुपैयाँ नगद शेयरधनीलाई वितरण गर्ने जनाएको हो । घोषित लाभांश पारित गर्न कम्पनीले पुस ३० गते १८औँ वार्षिक साधारण सभा बोलाएको छ । राष्ट्रिय सभागृह काठमाडौंमा बस्ने सभाले लाभांशसँगै गत आर्थिक वर्ष २०८१/८२ को सञ्चालक समितिको वार्षिक प्रतिवेदन, लेखापरीक्षकको प्रतिवेदनलगायतका आर्थिक र वित्तीय प्रतिवेदनहरु पारित गर्नेछ।
लाभांश तथा साधारण सभा प्रयोजनार्थ कम्पनीले पुस २० गतेदेखि पुस ३० गतेसम्म बुक क्लोज गर्ने निर्णय गरेको छ । उक्त लाभांश अर्थ मन्त्रालयको स्वीकृति पछि शेयरधनीलाई वितरण गरिने कम्पनीले जनाएको छ ।
प्रतिक्रिया दिनुहोस्