पाँच महिनामा जीवन बीमा कम्पनीहरूको व्यवसायमा उल्लेखनीय वृद्धि, कुन कम्पनीको कति ?

काठमाडाैं । चालु आर्थिक वर्ष २०८१-८२ को पहिलो पाँच महिनासम्म आइपुग्दा जीवन बीमा कम्पनीहरूको व्यवसायमा उल्लेखनीय वृद्धि देखिएको छ। बीमा कम्पनीहरूले सार्वजनिक गरेका तथ्यांकअनुसार अघिल्लो आर्थिक वर्षको सोही अवधिको तुलनामा जीवन बीमा व्यवसायमा उल्लेखनीय विस्तार भएको हो।

चालु आवको मंसिर मसान्तसम्म जीवन बीमा कम्पनीहरूले कुल ७६ अर्ब ९० करोड ५७ लाख रुपैयाँ बराबरको बीमाशुल्क संकलन गरेका छन्। गत वर्ष यही अवधिमा कम्पनीहरूले ६५ अर्ब ७४ करोड ८१ लाख रुपैयाँ बराबरको व्यवसाय गरेका थिए।

पाँच महिनाको अवधिमा सबैभन्दा धेरै व्यवसाय गर्ने कम्पनीका रूपमा नेपाल लाइफ इन्स्योरेन्स कम्पनी अगाडि रहेको छ। नेपाल लाइफले मंसिरसम्म २१ अर्ब ३७ लाख रुपैयाँ बराबरको कुल बीमाशुल्क संकलन गरेको छ। अघिल्लो वर्ष यही अवधिमा कम्पनीको बीमाशुल्क संकलन १८ अर्ब ७६ करोड ४८ लाख रुपैयाँ रहेको थियो।

व्यवसाय वृद्धिदरका हिसाबले भने राष्ट्रिय जीवन बीमा कम्पनी सबैभन्दा अगाडि देखिएको छ। कम्पनीले चालु आवको मंसिरसम्म ५ अर्ब ५७ करोड ६३ लाख रुपैयाँ बराबरको बीमाशुल्क संकलन गरेको छ।

यसैगरी, नेसनल लाइफ इन्स्योरेन्स कम्पनीले मंसिरसम्म ९ अर्ब २७ करोड २ लाख रुपैयाँ बीमाशुल्क संकलन गरेको छ, जुन अघिल्लो वर्षको सोही अवधिको ७ अर्ब ९८ करोड ६८ लाख रुपैयाँको तुलनामा उल्लेखनीय वृद्धि हो।

अन्य प्रमुख जीवन बीमा कम्पनीहरूमध्ये एलआईसी नेपालले ८ अर्ब १८ करोड १० लाख रुपैयाँ, हिमालयन लाइफले ६ अर्ब ९२ करोड ४३ लाख रुपैयाँ, सूर्यज्योति लाइफले ४ अर्ब ४७ करोड ९१ लाख रुपैयाँ, एसियन लाइफले ३ अर्ब ७५ करोड १७ लाख रुपैयाँ र सिटिजन लाइफले ३ अर्ब २३ करोड २५ लाख रुपैयाँ बराबरको बीमाशुल्क संकलन गरेका छन्।

त्यस्तै, सानिमा रिलायन्स लाइफले २ अर्ब ८० करोड ५२ लाख रुपैयाँ, मेटलाइफले २ अर्ब ६३ करोड ७६ लाख रुपैयाँ, आइएमई लाइफले २ अर्ब ४५ करोड ९४ लाख रुपैयाँ, रिलायबल नेपाल लाइफले २ अर्ब ३४ करोड २० लाख रुपैयाँ, प्रभु महालक्ष्मी लाइफले २ अर्ब २२ करोड १८ लाख रुपैयाँ तथा सन नेपाल लाइफले १ अर्ब ६४ करोड ९९ लाख रुपैयाँ बराबरको कुल बीमाशुल्क संकलन गरेका छन्।

बीमा सचेतना बढ्नु, नयाँ बीमालेख बिक्रीमा वृद्धि हुनु र कम्पनीहरूको विस्तार रणनीतिले जीवन बीमा व्यवसायमा सकारात्मक प्रभाव पारेको विज्ञहरूको भनाइ छ।

प्रतिक्रिया दिनुहोस्