काठमाडौं । सानिमा बैंक लिमिटेडका नवनियुक्त प्रमुख कार्यकारी अधिकृत (सीईओ) पवनकुमार आचार्यले पदभार ग्रहण गरेका छन् । आचार्यले आइतबार औपचारिक रूपमा पदभार ग्रहण्ण गरेका हुन् ।
उनलाई बैंक सञ्चालक समितिको गत कात्तिक २४ गते बसेको बैठकले सीईओमा नियुक्त गरेको थियो । दुई दशक बढी समयदेखि आचार्यले सानिमा बैंकमा निरन्तर विशिष्ट योगदान पुर्याउँदै आएका छन् । आचार्य सीईओको पदभार ग्रहणअघि बैंकमा वरिष्ठ नायब प्रमुख कार्यकारी अधिकृतको जिम्मेवारी सम्हाल्दै आएका थिए । आचार्यले बैंकमा २१ वर्षको उर्जाशील सेवाकालमा दशभन्दा बढी विभाग तथा शाखाको नेतृत्व गर्दै बैंकको संस्थागत विकासमा महत्वपूर्ण भूमिका निर्वाह गरेको बैंकले जनाएको छ ।
अमेरिकाको पिट्सबर्ग स्टेट युनिभर्सिटीबाट स्नातकोत्तर तथा भारतको एनआईटी जयपुरबाट इन्जिनियरिङमा स्नातक डिग्री हासिल गरेका आचार्यको प्रमुख कार्य क्षेत्र कर्जा मूल्याङ्कन, डिजिटलाइजेसन तथा परियोजना वित्तमा केन्द्रित छ । आचार्य सानिमा बैंकको सहायक कम्पनी सानिमा क्यापिटल लिमिटेडको अध्यक्ष समेत छन् ।
नवनियुक्त सीईओ आचार्यको विश्लेषणात्मक क्षमता, रणनीतिक भिजन र नेतृत्वमा सानिमा बैंकले थप सफलता हासिल गर्दै संस्थालाई उचाइमा पुर्याउने विश्वास बैंकले व्यक्त गरेको छ ।
प्रतिक्रिया दिनुहोस्