काठमाडौं । खानेपानी उपभोक्ता समितिहरूको संस्थागत क्षमता अभिवृद्धि गर्ने उद्देश्यले राजधानीमा तीन दिने तालिम कार्यक्रम सुरु भएको छ । नेपाल सरकार खानेपानी मन्त्रालय अन्तर्गतको राष्ट्रिय खानेपानी तथा सरसफाइ, अनुसन्धान, नवप्रवर्तन तथा क्षमता अभिवृद्धि केन्द्र र संयुक्त राष्ट्रसंघीय बसोबास कार्यक्रम (यूएन–ह्याबिटाट) को संयुक्त आयोजनामा उक्त तालिम सुरु भएको हो ।
यही वैशाख १० गतेसम्म सञ्चालन हुने यस तालिममा देशका विभिन्न स्थानका २४ वटा खानेपानी उपभोक्ता समिति तथा व्यवस्थापन बोर्डका ४५ जना प्रतिनिधिहरूको सहभागिता रहेको छ ।
तालिमको उद्देश्यबारे जानकारी दिँदै केन्द्रका कार्यकारी निर्देशक ईञ्जिनियर रामकुमार श्रेष्ठले उपभोक्ता समितिहरूलाई दक्ष बनाएर खानेपानी व्यवस्थापनलाई थप प्रभावकारी, पारदर्शी र दिगो बनाउनु रहेको बताए । स्थानीय स्तरमा खानेपानी समितिहरू महत्त्वपूर्ण संरचना हुन् । उनिहरुको नेतृत्व र व्यवस्थापन क्षमता बढेमा सेवा प्रवाह स्वतः प्रभावकारी हुन्छ,‘ श्रेष्ठले भने ।
तालिमका क्रममा सहभागीहरूलाई नेतृत्व विकास, संस्थागत एवं आर्थिक व्यवस्थापन, महसुल निर्धारण प्रक्रिया, सेवाको गुणस्तर सुधार र खरिद प्रक्रियाका मापदण्डका विषयमा विज्ञहरूले प्रशिक्षण दिनेछन् । तालिमको पहिलो दिन राष्ट्रिय सानासहकारी महासंघका अध्यक्ष खेम ओली, नगर विकास कोषका विज्ञ सुभाषराज पन्त, खानेपानी विज्ञहरू चोकप्रसाद धिताल र कमल अधिकारी, मन्त्रालयका प्रतिनिधि योगेन्द्र चित्रकार, विभागका सुरत बम तथा कार्यकारी निर्देशक श्रेष्ठले विषयगत प्रस्तुति दिएका थिए । विज्ञहरूले आयोजना सञ्चालन गर्दा अपनाउनुपर्ने प्राविधिक एवं प्रशासनिक प्रक्रिया र वित्तीय अनुशासनका बारेमा जोड दिएका थिए ।
नेपालका दुर्गम तथा ग्रामीण क्षेत्रका उपभोक्ता समितिहरूलाई लक्षित गरी पहिलो पटक आयोजना गरिएको यस प्रकारको तालिमले व्यवस्थापकीय र प्राविधिक ज्ञानको कमीका कारण उत्पन्न चुनौतीहरूलाई समाधान गर्न सहयोग पुग्ने अपेक्षा गरिएको छ । तालिमले स्थानीय स्तरमा खानेपानी सेवालाई थप व्यवस्थित र उत्तरदायी बनाउने विश्वास आयोजकको छ ।
प्रतिक्रिया दिनुहोस्