काठमाडौं । सगरमाथा आरोहणमा आइतबार एकैदिन दुई विश्व कीर्तिमान कायम भएको छ ।
कीर्तिमानी आरोही कामीरिता शेर्पाले आफ्नै रेकर्ड तोड्दै ३२ औं पटक र ‘माउन्टेन क्विन’ उपनामले परिचित लाक्पा शेर्पाले ११ औं पटक सगरमाथाको सफल आरोहण गरेका हुन् ।
५६ वर्षीय शेर्पाले आज बिहान १० बजेर १२ मिनेटमा सगरमाथाको चुचुरोमा पाइला टेकेर नयाँ इतिहास रचेका हुन्। सेभेन समिट ट्रेक्सका अनुसार, कामिरिताले यो सिजनको आफ्नो आरोहण सफलतापूर्वक सम्पन्न गर्नुका साथै विश्वमा सबैभन्दा धेरै पटक सगरमाथा आरोहण गर्ने व्यक्तिको रूपमा आफ्नो स्थान अझ सुरक्षित बनाएका छन्।
सेभेन समिटका अनुसार चुचुरोको सफल आरोहणपछि कामिरिता र उनको टोली अहिले आधार शिविरतर्फ ओर्लिने क्रममा छन् । सन् १९९४ मा पहिलोपटक सगरमाथाको सफल आरोहण गरेका कामिरिताले ‘एभरेस्ट म्यान’ को पहिचान बनाएका छन्।
उनको यो अतुलनीय सफलताले नेपाली पर्वतारोहण क्षेत्रमा फेरि एकपटक विश्वको ध्यान आकर्षित गरेको छ। ‘कामीरिता शेर्पालाई कुनै परिचयको आवश्यकता छैन। उहाँ नेपालको राष्ट्रिय आरोहण नायक मात्र होइन, सगरमाथाको विश्वव्यापी प्रतीक पनि हुनुहुन्छ। उहाँको शक्ति, अनुभव र निरन्तरताले वर्षौंदेखि पर्वतारोही समुदायलाई प्रेरणा दिइरहेको छ’ सेभेन समिट ट्रेक्सको फेसबुक पेजमा लेखिएको छ।
यसैगरी, ‘माउन्टेन क्विन’ उपनामले परिचित लाक्पा शेर्पाले पनि आइतबारै बिहान ९ ः ३० बजे ११औँपटक सगरमाथाको सफल आरोहण गरेकी थिइन् । यो सँगै उनले सबैभन्दा धेरैपल्ट सगरमाथा आरोहण गर्ने महिला आरोहीको विश्व कीर्तिमान कायम गरेकी छन् ।
प्रतिक्रिया दिनुहोस्