काठमाडौं । १६६ मेगावाट क्षमताको सुपर तमोर जलविद्युत आयोजना निर्माणका लागि १९ अर्ब रुपैयाँको वित्तीय व्यवस्थापन जुटेको छ।
ग्लोबल आइएमई बैंक लिमिटेडको अगुवाइमा आयोजनाको प्रवर्द्धक कम्पनी क्रिष्टल पावर डेभलपमेण्ट प्रा.लि. र सहभागी बैंकहरुबीच लगानीसम्बन्धी द्विपक्षीय अन्तिम सम्झौता भएको हो ।
ग्लोबल आइएमई बैंकका प्रमुख कार्यकारी अधिकृत सुरेन्द्रराज रेग्मीको उपस्थितिमा भएको उक्त सम्झौतामा बैंकका सहायक प्रमुख कार्यकारी अधिकृत दिप चन्द्र रेग्मी र क्रिष्टल पावर डेभलपमेण्टका कार्यकारी प्रमुख कृष्णप्रसाद आचार्य लगायत सहभागी बैंकका प्रतिनिधिहरूले हस्ताक्षर गरेका छन् ।
ताप्लेजुङ जिल्लाको फक्ताङलुङ गाउँपालिकास्थित तमोर नदीमा निर्माण हुने यस आयोजनाको कुल अनुमानित लागत २५ अर्ब रुपैयाँ रहेको छ । सम्झौताअनुसार कुल लागतको ७५ प्रतिशत (१९ अर्ब रुपैयाँ)बैंकहरूको कन्सोर्टियम (सह–वित्तीयकरण) मार्फत जुटाइनेछ । जसमध्ये ग्लोबल आइएमई बैंकले ५ अर्ब रुपैयाँ, सिद्धार्थ बैंकले ४ अर्ब रुपैयाँ, लक्ष्मी सनराइज बैंकले ४ अर्ब रुपैयाँ, प्रभु बैंकले ३ अर्ब ५० करोड रुपैयाँ, कृषि विकास बैंकले १ अर्ब ५० करोड तथा नेपाल एसबिआई बैंक १ अर्ब रुपैयाँ लगानी गर्ने छन्।
ग्लोबल आइएमई बैंकका सीईओ रेग्मीले यो आयोजना निर्धारित समयभित्रै सम्पन्न भई देशको ऊर्जा उत्पादन क्षमतामा वृद्धि हुने र विद्युत निर्यात प्रवर्द्धनमा ठूलो सहयोग पुग्ने विश्वास व्यक्त गरे। निर्माण सुरु भएको मितिबाट ५ वर्षभित्रै आयोजनाको काम सम्पन्न गर्ने लक्ष्य राखिएको छ ।
प्रतिक्रिया दिनुहोस्