ढोरपाटन (बागलुङ)। राष्ट्रिय गौरवको आयोजना कालीगण्डकी करिडोरअन्तर्गत मालढुङ्गा–बलेवा खण्डको कालोपत्र कार्य समयमै सम्पन्न नहुँदा यात्रुहरू समस्यामा परेका छन्। निर्माणमा ढिलाइ हुँदा सडक स्तरोन्नति अलपत्र जस्तै बनेको हो।
बागलुङ खण्डअन्तर्गत ३४ किलोमिटरमध्ये २४ किलोमिटर कालोपत्र भए पनि बाँकी १० किलोमिटर अझै निर्माण हुन सकेको छैन। निर्माण कम्पनीको सुस्त गतिका कारण दक्षिण बागलुङका स्थानीय तथा मुक्तिनाथ जाने पर्यटक प्रभावित भएका छन्।
उक्त सडक दुई वर्षभित्र सम्पन्न गर्ने गरी पाँच वर्षअघि निर्माण कम्पनीसँग सम्झौता गरिएको थियो। पछि गत जेठमा समय थपिए पनि काम अपेक्षित रूपमा अघि बढ्न नसक्दा सर्वसाधारणमा असन्तोष बढेको छ।
कालीगण्डकी करिडोर आयोजना कार्यालय बागलुङका इन्जिनियर होमनाथ पौडेलले चालु आर्थिक वर्षभित्र काम सम्पन्न नगरे निर्माण कम्पनीलाई कारबाही गर्ने चेतावनी दिएका छन्। उक्त खण्ड कालोपत्र गर्न करिब ४८ करोड १२ लाख रुपैयाँभन्दा बढी लागतमा सम्झौता गरिएको हो।
निर्माण व्यवसायी दिनबन्धु काफ्लेले भने बजेट अभावका कारण काम प्रभावित भएको स्वीकार गर्दै आवश्यक जनशक्ति र उपकरण परिचालन गरेर निर्धारित समयमा काम सम्पन्न गर्ने प्रतिबद्धता जनाएका छन्।
प्रतिक्रिया दिनुहोस्