काठमाडौं । सर्लाही प्रहरीले स्रोत नखुलेको ३२ लाख रुपैयाँ नगदसहित दुई जनालाई पक्राउ गरेको छ। भारतबाट नेपालतर्फ आउँदै गरेको मोटरसाइकललाई विशेष चेकजाँचका क्रममा रोकेर जाँच गर्दा उक्त रकम बरामद भएको प्रहरीले जनाएको छ।
जिल्ला प्रहरी कार्यालय सर्लाहीका अनुसार बिहीबार अपराह्न करिब ४ बजे मलंगवा नगरपालिका–१० स्थित डिम पुल क्षेत्रमा मप्र ०५–००१ प ११०६ नम्बरको मोटरसाइकल जाँच गर्ने क्रममा चालकसँग रहेको स्रोत नखुलेको ३२ लाख रुपैयाँ फेला परेको हो। घटनामा संलग्न रहेको आरोपमा रामनगर गाउँपालिका–३ का २८ वर्षीय गुडुकुमार यादव र रामनगर गाउँपालिका–१ का २४ वर्षीय रुपेश कुमार यादवलाई नियन्त्रणमा लिइएको जिल्ला प्रहरी कार्यालय सर्लाहिका प्रवक्ता वेदप्रसाद गौतमले जानकारी दिए।
प्रहरीले उनीहरूको साथबाट ३२ लाख रुपैयाँ नगद, दुई वटा मोटरसाइकल तथा ओप्पो रेनो ११ र स्यामसुङ ग्यालेक्सी एम३६ मोबाइल फोन बरामद गरेको छ।
पक्राउ परेका दुवै जनामाथि हुण्डीसम्बन्धी मुद्दामा थप अनुसन्धान भइरहेको प्रहरीले जनाएको छ।
प्रतिक्रिया दिनुहोस्