काठमाडौं । बैंकिङ प्रणालीमा अधिक तरलता थुप्रिएसँगै नेपाल राष्ट्र बैंकले आज ४० अर्ब रुपैयाँ तरलता प्रशोचन गर्न लागेको छ ।
केन्द्रीय बैंकले २१ दिनका लागि उक्त निक्षेप संकलन बोलकबोल बिधि मार्फत ४० अर्ब रुपैयाँ तरलता आईतबार तान्न लागेको जनाएको हो ।
हाल बैंकिङ प्रणालीमा निक्षेप निरन्तर बढेको छ । तर, बैंकमा थुप्रिएको निक्षेप अनुपातमा कर्जा लगानी भने हुन सकेको छैन । केन्द्रीय बैंकले आज जारी गरेको निक्षेप संकलन उपकरणको दिउँसो ३ बजे अनलाइन बोलकबोल गर्ने जनाएको छ ।
निक्षेप दिन चाहने बैंक तथा वित्तीय संस्थाले घटीमा १० करोड रुपैयाँ र बढीमा ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्म बोलकबोल गर्न सक्नेछन् । निक्षेप संकलनको बोलकबोल बहुब्याजदरमा पनि गर्न सकिने राष्ट्र बैंकले जनाएको छ ।
निक्षेप संकलन उपकरणको बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन् । यो २१ दिने निक्षेप संकलन उपकरणको चैत २४ गते साँवा तथा ब्याज भुक्तानी गरिने राष्ट्र बैंकले जनाएको छ।
यस अघि राष्ट्र बैंकले फागुन २८ गते २१ दिनका लागि ५० अर्ब , फागुन २५ गते २१ दिनकै लागि २५ अर्ब रुपैयाँ निक्षेप खिचेको थियो ।
प्रतिक्रिया दिनुहोस्