काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले कुलमान घिसिङलाई बर्खास्ती गर्नुका चित्तबुझ्दो जवाफ प्रधानमन्त्रीले रोस्टमबाट नदिएसम्म संसद् चल्न नदिने बताएका छन् ।
विपक्षी दलको बैठकपछि संसद् भवन परिसरमा मंगलबार अध्यक्ष प्रचण्डले नेपाल विद्युत् प्राधिकरणको कार्यकारी निर्देशक पदबाट कुलमान घिसिङलाई सरकारले हटाउनुको कारण माग गरे । उनले विपक्षी दलहरूले संसद्का दुवै सदनको बैठक अवरोध गरेको उल्लेख गर्दै प्रधानमन्त्री केपी शर्मा ओलीले चित्तबुझ्दो जवाफ नदिएसम्म संसद चल्न नदिने चेतावनि दिए ।
‘अहिले केही भन्नु छैन । हामीले प्रधानमन्त्रीले आएर रोष्ट्रममा जवाफ नदिएसम्म हाउस चल्न नदिने भनेका छौं । प्रधानमन्त्रीले यसलाई सहज ढंगले लिनुपर्ने हुन्छ,’ अध्यक्ष प्रचण्डले भने ।
उनले कुलमान प्रकरणमा सरकारको स्पष्टीकरण चित्तबुझ्दो नआए आन्दोलन गर्ने बताए । उनले भने, ‘प्रधानमन्त्रीले आएर स्पष्टीकरण दिनुपर्ने हुन्छ । स्पष्टीकरण चित्तबुझ्दो भयो ने तुरुन्तै हाउस चल्छ, स्पष्टीकरण पनि जालझेलको भयो भने आन्दोलन अघि बढ्छ ।’
प्रतिक्रिया दिनुहोस्